౨౭. అసంవాసనిద్దేసవణ్ణనా

౧౯౮. ఉక్ఖిత్తోతి కమ్మనానాసంవాసకసఙ్ఖాతో ఆపత్తియా అదస్సనే, అప్పటికమ్మే, పాపికాయ దిట్ఠియా అప్పటినిస్సగ్గే ఉక్ఖిత్తకో. అనుపసమ్పన్నోతి సిక్ఖమానసామణేరసామణేరిసిక్ఖాపచ్చక్ఖాతసఙ్ఖాతో అనుపసమ్పన్నో. ఛిన్నమూలకోతి అన్తిమవత్థుఅజ్ఝాపన్నో. ఉక్ఖిత్తకేసు ‘‘ధమ్మవాదినో ఏతే’’తి ఉప్పన్నాయ లద్ధియా నానాభూతో సంవాసో ఏతస్సాతి నానాసంవాసో, ఉక్ఖిత్తానువత్తకసఙ్ఖాతో లద్ధినానాసంవాసకో. సీమతో నిగ్గతా నిస్సీమా, సీమన్తరికా బహిసీమా చ, తత్థ హత్థపాసే చేపి ఠితో, సీమానానాసంవాసకో నిస్సీమట్ఠితో. వేహాయసే ఆకాసే ఠితో వేహాయసణ్ఠితో బిన్దాగమేన. తత్థ ‘‘నానాసంవాసో చా’’తిఆదినా సమాహారద్వన్దేపి క్వచి నపుంసకలిఙ్గం బ్యభిచరతీతి నపుంసకత్తాభావో యథా ‘‘మగ్గామగ్గో’’తి. ఏకకమ్మం ఏకుద్దేసో సమసిక్ఖతాతి అయం తివిధోపి సంవాసో నామ. సో యేసం నత్థి, తే అసంవాసా. ఏతే హత్థపాసతో బహికరణవసేన వజ్జేతబ్బా. ఏతేసు హి తివిధే ఉక్ఖిత్తకే సతి ఉపోసథాదికం కమ్మం కరోన్తస్స పాచిత్తియం, ఇతరేసు దుక్కటన్తి.

అసంవాసనిద్దేసవణ్ణనా నిట్ఠితా.