౧౬. వచ్చపస్సావట్ఠానికనిద్దేసవణ్ణనా

౧౫౬. వచ్చపస్సావట్ఠానికన్తి ఠానమ్హి ఠానే వా భవం వచ్చపస్సావట్ఠానికం. యథావుడ్ఢం వచ్చం న కరేయ్యాతి సమ్బన్ధో. యే యే వుడ్ఢా యథావుడ్ఢం, ఆగతప్పటిపాటిం హిత్వా వుడ్ఢప్పటిపాటియాతి అత్థో. వచ్చన్తి ఉపలక్ఖణమత్తం, పస్సావఞ్చ నహానఞ్చ న కరేయ్యాతి అధిప్పాయో. తదేవ సమత్థేతి ‘‘యాతానుపుబ్బియా’’తిఆదినా. యాతానుపుబ్బియాతి యాతానం గతానం అనుపుబ్బి అనుక్కమో యాతానుపుబ్బి, తాయ. వచ్చ…పే… తిత్థఞ్చాతి ఏతం తయం లబ్భతీతి అత్థో, భిక్ఖునాతి విఞ్ఞాయతి.

౧౫౭. ఉబ్భజిత్వా చ సహసా చ నో పవిసేయ్యాతి సమ్బన్ధో. ఉబ్భజిత్వాతి చీవరం దూరతోవ ఉక్ఖిపిత్వా. సహసాతి సీఘం. ఉక్కాసిత్వా పవిసేయ్యాతి యోజనా.

౧౫౮. వచ్చపస్సావదోణీనం బహీతి సమ్బన్ధో. ఉభయన్తి వచ్చమ్పి పస్సావమ్పి.

౧౫౯. కూపేతి వచ్చావాటే. కట్ఠన్తి అవలేఖనకట్ఠం. ఫరుసేనాతి ఖరేన అవలేఖనకట్ఠేన. ఉహతఞ్చాపీతి అత్తనా వా పరేన వా ఉహతఞ్చాపి వచ్చమక్ఖితఞ్చాపీతి అత్థో. ధోవయేతి సతి ఉదకే, ఉదకే అసతి కట్ఠేనపి సోధేయ్య.

౧౬౦. న నిక్ఖమేతి న నిక్ఖమేయ్య. చపు చపూతి అనుకరణం, విచ్ఛాయం ద్విత్తే చపు చపు కత్వాతి కిరియావిసేసనం. నాచమేయ్యాతి న ధోవేయ్య. సతి పన ఉదకే ఆచమితబ్బం, అసతి యేన కేనచి పుఞ్ఛిత్వా గన్తబ్బం, సబ్బసాధారణట్ఠానే చ ఆచమనకుమ్భియా ఉదకం న సేసేతబ్బం. ఉక్లాపన్తి కచవరం. విసోధయేతి విహారసోధనే వియ వచ్చపస్సావకుటియో, పరివేణకోట్ఠకే చ సమ్మజ్జేయ్య. సబ్బత్థేవ చ పన వత్తభేదే దుక్కటం.

వచ్చపస్సావట్ఠానికనిద్దేసవణ్ణనా నిట్ఠితా.