౧౭. ఆపుచ్ఛకరణనిద్దేసవణ్ణనా

౧౬౧. ఆపుచ్ఛకరణన్తి ఆపుచ్ఛాయ కరణం. అనజ్ఝిట్ఠోవాతి అనాణత్తోవ, అయాచితో ఏవ వా. న చ విస్సజేతి పుచ్ఛితపఞ్హం న విస్సజ్జేయ్య చ, ఆపుచ్ఛిత్వా వా యాచితో వా యథావుత్తమేతం కాతుం లభతీతి అధిప్పాయో.

౧౬౨. ఆపుచ్ఛిత్వా కథేన్తస్సాతి అత్తనో వుడ్ఢం ఆపుచ్ఛిత్వా ధమ్మాదికం భాసన్తస్స. పున వుడ్ఢతరాగమేతి పున అఞ్ఞస్స వుడ్ఢతరస్స ఆగమనే సతీతి అత్థో. పునఆపుచ్ఛనం నత్థీతి భాసితబ్బం ఠపేత్వా పున ఆపుచ్ఛనకిచ్చం నత్థీతి అత్థో. సఙ్ఘత్థేరే అసతి ఆరద్ధమ్పి అట్ఠపేత్వా కథేన్తస్సాపి ఏసేవ నయో. భత్తగ్గే అనుమోదతో చ ఆపుచ్ఛనం నత్థీతి సమ్బన్ధో. అనుమోదతోతి దాయకేహి యాచితస్స తంతంపుఞ్ఞానుమోదనవసేన ధమ్మకథం కరోతో చ. అనుమోదనఞ్చ థేరాధేయ్యం. ‘‘అనుజానామి, భిక్ఖవే థేరేన భిక్ఖునా భత్తగ్గే అనుమోదితు’’న్తి (చూళవ. ౩౬౨) హి వుత్తం. ‘‘సచే మనుస్సా అత్తనో అభిరుచికేన ఏకేన అనుమోదనం కారేన్తి, నేవ తస్స అనుమోదతో ఆపత్తి, న మహాథేరస్స భారో హోతి. ఉపనిసిన్నకథాయమేవ హి మనుస్సేసు కథాపేన్తేసు మహాథేరో ఆపుచ్ఛితబ్బో’’తి అట్ఠకథాయం (చుళవ. అట్ఠ. ౩౬౨) వుత్తం.

౧౬౩. వుడ్ఢేన ఏకవిహారకే వసన్తో చాతి సమ్బన్ధో. వుడ్ఢేనాతి వుడ్ఢేన సద్ధిం. ఏకవిహారకేతి సవనూపచారే ఖుద్దకవిహారే, న మహావిహారే. కుచ్ఛితత్థే హి కప్పచ్చయో. న సజ్ఝాయేయ్యాతి సజ్ఝాయనం న కరేయ్య.

౧౬౪. ‘‘ధమ్మం న భాసయే’’తిఆదీసు అనాపుచ్ఛాతి సమ్బన్ధితబ్బం. న చ విజ్ఝపేతి న చ నిబ్బాయేయ్య. వాతపానఞ్చ ఆలోకసన్ధిఫలకం కవాటఞ్చ ద్వారఫలకం వాతపానకవాటం వా న వివరేయ్య న థకేయ్య చాతి న-కారో సబ్బత్థ యోజేతబ్బో.

౧౬౫. ఏకచఙ్కమే వుడ్ఢేన చఙ్కమన్తోపి యేన వుడ్ఢో, తేన పరివత్తయేతి యోజనా. యేన తేనాతి భుమ్మత్థే కరణవచనం, యత్థ వుడ్ఢో, తత్థాతి అత్థో, వుడ్ఢం ఓహాయ అఞ్ఞతో న గన్తబ్బన్తి అధిప్పాయో. సోతి నవకో. ఏనన్తి వుడ్ఢం. సబ్బత్థ దుక్కటం. అయఞ్హి ఖన్ధకధమ్మతా యత్థ న-కారేన పటిసేధో, తత్థ దుక్కటన్తి.

ఆపుచ్ఛకరణనిద్దేసవణ్ణనా నిట్ఠితా.