౧౦. అకప్పియమంసనిద్దేసవణ్ణనా

౧౧౩-౪. మనుస్సహత్థిఅస్సానఞ్చ …పే… ఉరగస్స చ యం మంసఞ్చ, యం ఉద్దిస్సకతమంసఞ్చ, అప్పటివేక్ఖితం యఞ్చ మంసం, తేసు మంసేసూతి ఏవం యోజేత్వా అత్థో వేదితబ్బో. తత్థ సీసగీవాతరఙ్గేన చరన్తా అచ్ఛవిసేసావ తరచ్ఛా. ఉరగస్సాతి ఇమినా సబ్బాపి దీఘజాతి సఙ్గహితా. ఉద్దిస్సకతమంసన్తి భిక్ఖుం ఉద్దిసిత్వా కతం ఉద్దిస్సకతం, తఞ్చ తం మంసఞ్చ. ఏత్థ చ మంస-గ్గహణేన మచ్ఛానమ్పి గహణం వేదితబ్బం ఉపలక్ఖణవసేన, చ-సద్దేన వా. పఞ్చసుపి సహధమ్మికేసు యం కిఞ్చి ఉద్దిస్సకతం సబ్బేసమ్పి న కప్పతి, తమ్పి అదిట్ఠఅసుతఅపరిసఙ్కితతాయ తికోటిపరిసుద్ధం వట్టతి. అప్పటివేక్ఖితన్తి అనుపపరిక్ఖితం, అనాపుచ్ఛితన్తి అత్థో. ఆపత్తిభీరుకేన హి రూపం సల్లక్ఖేన్తేనాపి పుచ్ఛిత్వా పటిగ్గహేతబ్బం పరిభుఞ్జితబ్బఞ్చ. మనుస్సానం మంసేసు థుల్లచ్చయన్తి యోజనా. థూలో అచ్చయో ఏత్థాతి రస్సే, ద్విత్తే చ థుల్లచ్చయం. పారాజికసఙ్ఘాదిసేసేహి ఠపేత్వా ఇతో అధికం వజ్జం నత్థి. సేసేసూతి అవసేసేసు ఏకాదససు.

౧౧౫. ఇదాని మనుస్సాదీనం అట్ఠిఆదీనిపి అకప్పియానీతి దస్సేతుం ‘‘అట్ఠిపీ’’తిఆదిమాహ. పి-సద్దో ‘‘లోహిత’’న్తిఆదీసుపి అనువత్తేతబ్బో. ఏసన్తి మనుస్సాదీనం దసన్నం. వసాసు పన ఏకా మనుస్సవసా న వట్టతి. ఖీరాదీసు అకప్పియం నామ నత్థి. ఉద్దిస్సకతంయేవ సచిత్తకన్తి యోజనా. సచిత్తకన్తి ఉద్దిస్సకతభావజాననచిత్తేన సహ వత్తతీతి సచిత్తకం. వత్థువీతిక్కమవిజాననచిత్తేన హి సచిత్తకత్తం. ఏత్థ చ సచిత్తకత్తం ఆపత్తియా ఏవ, న చ మంసస్స, తథాపి మంససీసేన ఆపత్తి ఏవ వుత్తాతి విఞ్ఞాతబ్బన్తి.

అకప్పియమంసనిద్దేసవణ్ణనా నిట్ఠితా.