౯. పటిగ్గాహనిద్దేసవణ్ణనా

౧౦౬. ఇదాని ‘‘పటిగ్గాహో’’తి పదం విత్థారేతుం ‘‘దాతుకామాభిహారో చా’’తిఆది ఆరద్ధం. తత్థ దాతుకామస్స అభిహారో దాతుకామాభిహారో. ఏతేన అఞ్ఞస్స పత్తే పక్ఖిపితుం ఆలులేన్తస్స ఫుసితాని ఉట్ఠహిత్వా అఞ్ఞస్స పత్తే సచే పతన్తి, పటిగ్గహణం న రుహతీతి దీపితం హోతి. ఏరణక్ఖమన్తి థామమజ్ఝిమేన పురిసేన ఉక్ఖిపనక్ఖమం, తతో మహన్తే పటిగ్గహణం న రుహతి. తిధా దేన్తేతి కాయకాయప్పటిబద్ధనిస్సగ్గియానం వసేన తిధా దేన్తే. తస్స భిక్ఖునో కాయకాయప్పటిబద్ధేహి ద్విధా గాహోతి అత్థో. పఞ్చఙ్గో ఏవం పఞ్చఙ్గేవం. దాతుకామాభిహారో ఏకం, హత్థపాసో ఏకం, ఏరణక్ఖమతా ఏకం, దేవమనుస్సతిరచ్ఛానగతేసు ఏకేన తిధా దానమేకం, ద్విధా గాహో ఏకన్తి ఏవం పఞ్చఙ్గాని హోన్తి.

౧౦౭. ఇదాని యేన కాయప్పటిబద్ధేన పటిగ్గహణం న రుహతి, తం దస్సేతుం ‘‘అసంహారియే’’తిఆదిమాహ. ఖాణుకే (పాచి. అట్ఠ. ౨౬౫) బన్ధిత్వా ఠపితమఞ్చాదిమ్హి వా ఫలకే వా పాసాణే వా అసంహారియే న రుహతీతి అత్థో. తత్థజాతే పదుమినిపణ్ణే వా కింసుకపణ్ణాదిమ్హి వా న వట్టతి, సుఖుమే చిఞ్చఆదీనం పణ్ణే వా న రుహతి, యఞ్చ మజ్ఝిమపురిసో సన్ధారేతుం న సక్కోతి, తస్మిం అసయ్హభారే చ పటిగ్గహో న రుహతీతి అత్థో.

౧౦౮. ఇదాని పటిగ్గహణవిజహనం దస్సేతుం ‘‘సిక్ఖామరణలిఙ్గేహీ’’తిఆది ఆరద్ధం. తత్థాయం పిణ్డత్థో – సిక్ఖాపచ్చక్ఖానేన చ మరణేన చ లిఙ్గపరివత్తనేన చ ‘‘న తం దాని పరిభుఞ్జిస్సామీ’’తి వా ‘‘న పున పటిగ్గహేత్వా పరిభుఞ్జిస్సామీ’’తి వా ఏవం అనపేక్ఖవిస్సజ్జనేన చ చోరాదీహి వా అచ్ఛేదా చ అనుపసమ్పన్నస్స దానా చ గాహో పటిగ్గాహో ఉపసమ్మతి విజహతీతి. భిక్ఖునియా పన సిక్ఖాపచ్చక్ఖానస్స అభావా విబ్భమనేన చ విజహతీతి గహేతబ్బం.

౧౦౯-౧౧౦.

.ఇదాని పటిగ్గహేత్వా పరిభుఞ్జితబ్బం దస్సేతుం ‘‘అప్పటిగ్గహితం సబ్బ’’న్తిఆది వుత్తం. తస్సత్థో (కఙ్ఖా. అట్ఠ. దన్తపోనసిక్ఖాపద) – చతుకాలికపరియాపన్నం అన్తమసో రజరేణుమ్పి అప్పటిగ్గహేత్వా సబ్బం పరిభుఞ్జతో పాచిత్తి. ఇదాని అప్పటిగ్గహేత్వా పరిభుఞ్జితబ్బం దస్సేతుం ‘‘సుద్ధఞ్చ నాతిబహల’’న్తిఆది వుత్తం. తత్థ సుద్ధఞ్చాతి అఞ్ఞేసం రసేన అసమ్మిస్సం. హిమోదకసముద్దోదకాదీసు పటిగ్గహణకిచ్చం నత్థి. లోణఞ్చ అస్సు చ లోణస్సు. ఏత్థ లోణం నామ సరీరే ఉట్ఠితం. ఏతాని పన సబ్బాని అవిచ్ఛిన్నానేవ కప్పన్తి, నేతరాని.

౧౧౧. ఇదాని అనఙ్గలగ్గానిపి దస్సేతుం ‘‘గూథమత్తికముత్తానీ’’తిఆదిమాహ. తథావిధేతి తథావిధే కాలే, సప్పదట్ఠకాలేతి అత్థో. అఞ్ఞేసం పన అప్పటిగ్గహితం అనఙ్గలగ్గం న వట్టతి. కస్మా? ‘‘అనుజానామి, భిక్ఖవే, యం కరోన్తో పటిగ్గణ్హాతి, స్వేవ పటిగ్గహో కతో, న పున పటిగ్గహేతబ్బో’’తి (మహావ. ౨౬౮) వుత్తత్తా.

౧౧౨. దురూపచిణ్ణేతి దుప్పరామట్ఠే ఫలికరుక్ఖవల్లిఆదిం చాలేన్తస్స వా ఆమిసభరితభాజనం అప్పటిగ్గహితం పరామసన్తస్స వా దురూపచిణ్ణదుక్కటం హోతీతి అత్థో. రజోకిణ్ణేతి భిక్ఖాయ చరన్తస్స పత్తే పతితరజం అప్పటిగ్గహేత్వా పున భిక్ఖం గణ్హతో వినయదుక్కటం హోతీతి అత్థో. అథుగ్గహప్పటిగ్గహేతి అథ ఉగ్గహప్పటిగ్గహే, అత్తనా ఏవ ఉగ్గహేత్వా గహితేతి అత్థో. అకప్పియకుటియం అన్తోవుత్థే చ యత్థ కత్థచి భిక్ఖునా సయంపక్కే చ అత్తనా వా పరేన వా అకప్పియకుటియం అన్తోపక్కే చాతి సబ్బత్థ దుక్కటన్తి అధిప్పాయో. పటిగ్గాహవినిచ్ఛయో.

పటిగ్గాహనిద్దేసవణ్ణనా నిట్ఠితా.