౧౦. అకప్పియమంసనిద్దేసవణ్ణనా

౧౧౩. ఇదాని మంసేసు పటిపజ్జితబ్బాకారం దస్సేతుం ‘‘మంసేసు చ అకప్పియ’’న్తి ఉద్ధటం. అకప్పియమంసమ్హి దస్సితే కప్పియమంసం దస్సితమేవ హోతి పారిసేసనయేన. ఉరగస్స చాతి ఏత్థ సబ్బోపి ఉరగో న కప్పతి.

౧౧౪. ఏత్తావతా జాతివసేన దసవిధమ్పి అకప్పియమంసం దస్సేత్వా ఇదాని కప్పియమంసేసుపి అకప్పియవిధిం దస్సేతుం ‘‘ఉద్దిస్సకతమంసఞ్చ, యఞ్చ అప్పటివేక్ఖిత’’న్తి వుత్తం. తత్థ పఞ్చసు సహధమ్మికేసు యస్స కస్సచి యం కిఞ్చి ఉద్దిస్స కతం ఉద్దిస్సకతం నామ, తం పన జానిత్వా పరిభుఞ్జితుం సబ్బేసమ్పి న వట్టతి, అజానన్తానం అనాపత్తి. మచ్ఛేసుపి ఏసేవ నయో. అప్పటివేక్ఖితన్తి అనుపపరిక్ఖితం, అనాపుచ్ఛితన్తి అత్థో. ‘‘న భిక్ఖవే అప్పటివేక్ఖిత్వా మంసం పరిభుఞ్జితబ్బం, యో పరిభుఞ్జేయ్య, ఆపత్తి దుక్కటస్సా’’తి (మహావ. ౨౮౧) వుత్తం. మచ్ఛేసు పన ఆపుచ్ఛనకిచ్చం నత్థి అకప్పియమచ్ఛానం నత్థితాయాతి వదన్తి. ఇదాని ఏతేసు ఆపత్తిభేదం దస్సేతుం ‘‘థుల్లచ్చయ’’న్తిఆదిమాహ. తం సబ్బం (కఙ్ఖా. అట్ఠ. సన్నిధికారకసిక్ఖాపదవణ్ణనా) ఉత్తానమేవ.

౧౧౫. ఇదాని న కేవలం ఇమేసం మనుస్సాదీనం మంసమేవ అకప్పియం, అట్ఠిఆదీనిపి అకప్పియానీతి దస్సేతుం ‘‘అట్ఠీపీ’’తిఆది వుత్తం. తత్థ (మహావ. అట్ఠ ౨౮౧) లోమమ్పేసన్తి లోమమ్పి ఏసం అకప్పియమంసవత్థూనన్తి అత్థో. సచిత్తకం వాతి ఏతేసు పన ఉద్దిస్సకతమేవ సచిత్తకం, సేసా అచిత్తకాతి. అకప్పియమంసవినిచ్ఛయో.

అకప్పియమంసనిద్దేసవణ్ణనా నిట్ఠితా.