౩౬. భేసజ్జనిద్దేసవణ్ణనా

౨౭౪-౫. సహధమ్మినం లబ్భం భేసజ్జకరణన్తి సమ్బన్ధో. న కేవలం పఞ్చన్నం సహధమ్మికానంయేవ భిక్ఖాచరియవిఞ్ఞత్తిసకేహి భేసజ్జకరణం లబ్భతి, అథ ఖో అపరేసమ్పి పఞ్చన్నం లబ్భతి, తే దస్సేన్తో ‘‘పితూన’’న్తిఆదిమాహ. పితూనన్తి మాతాపితూనన్తి అత్థో. యే మాతాపితరో జగ్గన్తి ఉపట్ఠహన్తి, తే తదుపట్ఠాకా నామ. భిక్ఖుం ఏవ నిస్సాయ జీవన్తో భిక్ఖునిస్సితకో నామ. పబ్బజ్జాపేక్ఖో ‘‘భణ్డూ’’తి వుచ్చతి.

౨౭౬. అపరేసమ్పి దసన్నం కాతుం వట్టతి, తే దస్సేతుం ‘‘మహాచూళపితా’’తిఆదిమాహ. ఏత్థ (పారా. అట్ఠ. ౨.౧౮౫-౧౮౭) పన మహాపితా చూళపితా మహామాతా చూళమాతా మహాభాతా చూళభాతా మహాభగినీ చూళభగినీతి ఇమేహి అట్ఠహి ఆది-సద్దేన పితుభగినిఞ్చ మాతుభాతికఞ్చ గహేత్వా దస. ఏతేసం పన సకేన భేసజ్జేన కాతబ్బం. అత్తనియే చ అసతీతి పాఠసేసో.

౨౭౭. న కేవలఞ్చ ఏతేసం దసన్నం, ఇమేహి సమ్బన్ధానం పుత్తనత్తాదీనం యావసత్తమా కులపరివట్టా కాతుం వట్టతీతి దస్సనత్థం ‘‘కులదూసనా’’తిఆదిమాహ. అఞ్ఞోపి (పారా. అట్ఠ. ౨.౨౮౫-౨౮౭) యో ఆగన్తుకో వా చోరో వా యుద్ధపరాజితో వా ఇస్సరో ఞాతకేహి పరిచ్చత్తో వా గమియమనుస్సో వా గిలానో హుత్వా విహారం పవిసతి, సబ్బేసమ్పి అపచ్చాసీసన్తేన భేసజ్జం కాతబ్బం.

౨౭౮. మాతా (పారా. అట్ఠ. ౨.౧౮౫-౧౮౭) పితా తదుపట్ఠాకో భిక్ఖునిస్సితకో పణ్డుపలాసో వేయ్యావచ్చకరోతి ఇమేసం ఛన్నం అనామట్ఠపిణ్డపాతో అవారితోతి అత్థో. కిఞ్చ భియ్యో – దామరికచోరస్స చ ఇస్సరియస్స చ దాతుమవారితోతి అత్థో.

౨౭౯. తేసన్తి (పారా. అట్ఠ. ౨.౧౮౫-౧౮౭) గహట్ఠానం. సాసనోగధన్తి రతనపరిత్తఆటానాటియపరిత్తాదిపరిత్తం భణితబ్బన్తి అత్థో.

౨౮౦. ‘‘ఆగన్త్వా (పారా. అట్ఠ. ౨.౧౮౫-౧౮౭) సీలం దేతు, ధమ్మఞ్చ పరిత్తఞ్చ భాసతూ’’తి కేనచి పేసితోతి సమ్బన్ధో. దాతుం వత్తున్తి సీలం దాతుం, ధమ్మఞ్చ పరిత్తఞ్చ వత్తుం లబ్భతీతి అత్థో. భేసజ్జవినిచ్ఛయో.

భేసజ్జనిద్దేసవణ్ణనా నిట్ఠితా.