౩౩. కాయబన్ధననిద్దేసవణ్ణనా

౨౩౫. అకాయబన్ధనోతి కాయబన్ధనం అబన్ధిత్వాతి అత్థో. తతో పట్ఠాయ చీవరం పారుపితబ్బం, తతో పట్ఠాయ ఏవ కాయబన్ధనం బన్ధితబ్బం. ‘‘న భిక్ఖవే అకాయబన్ధనేన గామో పవిసితబ్బో. యో పవిసేయ్య, ఆపత్తి దుక్కటస్సా’’తి (చూళవ. ౨౭౮) హి వుత్తం. తత్థేవాసతియా గతోతి అసతియా గతో యత్థ సరతి, తత్థేవ బన్ధితబ్బం. సరిత్వా పన యావ న బన్ధతి, తావ పిణ్డాయ చరితుం న వట్టతి. యది అన్తోగామే సరతి, కాయబన్ధనే సతి ఏకమన్తే ఠత్వా బన్ధితబ్బం, అసతి చే నిక్ఖమిత్వా బన్ధిత్వా పున పిణ్డాయ పవిసితబ్బన్తి వదన్తి.

౨౩౬. ‘‘అనుజానామి, భిక్ఖవే, ద్వే కాయబన్ధనాని పట్టికం సూకరన్తక’’న్తి (చూళవ. ౨౭౮) వుత్తత్తా ‘‘దువిధ’’న్తి వుత్తం. తత్థ సూకరన్తం నామ కుఞ్చికాకోసకా వియ అన్తే సుసిరం కత్వా కోట్టితం. రజ్జు చ ఏకాతి ఏకవట్టా రజ్జు చ. తదనులోమికాతి తేసం ద్విన్నం అనులోమికా.

౨౩౭. మచ్ఛకణ్డకఖజ్జురీ-పత్తా మట్ఠా చ పట్టికాతి ఏత్థ (చూళవ. అట్ఠ. ౨౭౮) ఏతే మచ్ఛకణ్టకాదయో మట్ఠా వికారరహితా పట్టికా చ తదన్తోగధాతి అధిప్పాయో. లబ్భా దసా చతస్సోతి ఏకాయ వా ద్వీసు వా తీసు వా కథా ఏవ నత్థీతి అధిప్పాయో, తతో పరం న వట్టతి. అన్తేసూతి ఉభోసు అన్తేసు. గుణసుత్తకన్తి దిగుణసుత్తకం.

౨౩౯. మకరముఖాదిన్తి ఆది-సద్దేన దేడ్డుభసీసం గహితం. ఉభన్తేతి ఉభోసు అన్తేసు. కస్సాతి? విధస్స. ఘటకాతి ఘటకతో. లేఖాతి లేఖాయ. ఘటకతో చ లేఖాయ చ అఞ్ఞం చిత్తకం న కప్పతీతి అత్థో.

౨౪౦. దేడ్డుభకన్తి (చూళవ. ౨౭౮; చూళవ. అట్ఠ. ౨౭౮) ఉదకసప్పసిరసదిసం. మురజన్తి బహురజ్జుకే ఏకతో సఙ్కడ్ఢిత్వా ఏకాయ రజ్జుయా పలివేఠేత్వా కతరజ్జు. మద్దవీణన్తి పామఙ్గసదిసం. కలాబుకన్తి అనేకవట్టం. ఏతాని పన సబ్బాని న కప్పన్తి. దసాసు ద్వే మజ్ఝిమాతి మురజం మద్దవీణన్తి ద్వే మజ్ఝిమా ఏవ. కప్పరేతి కప్పన్తీతి అత్థో.

౨౪౧. గణ్ఠియో చాపీతి (చూళవ. ౨౭౯) చీవరగణ్ఠియోపి. వేళుఆదిమయా కప్పన్తీతి పసఙ్గేన వుత్తం. కాయబన్ధనవినిచ్ఛయో.

కాయబన్ధననిద్దేసవణ్ణనా నిట్ఠితా.

పఠమభాణవారం.