౩౦. వత్తనిద్దేసవణ్ణనా

౨౧౩. ఇదాని ఆగన్తుకవత్తాదీని దస్సేతుం ‘‘వత్త’’న్తి మాతికాపదం ఉద్ధటం. పరిక్ఖిత్తస్స (చూళవ. ౩౫౬ ఆదయో; చూళవ. అట్ఠ. ౩౫౭ ఆదయో) విహారస్స పరిక్ఖేపం, అపరిక్ఖిత్తస్స ద్వీహి లేడ్డుపాతేహి పరిచ్ఛిన్నట్ఠానం పత్వా ఉపాహనం ఓముఞ్చిత్వా నీచం కత్వా పప్ఫోటేత్వా ఉపాహనం దణ్డకేన గహేత్వా ఛత్తం అపనామేత్వా సీసం వివరిత్వా సీసే చీవరం ఖన్ధే కరిత్వా సాధుకం అతరమానేన ఆరామో పవిసితబ్బోతి అత్థో.

౨౧౪. పుచ్ఛేయ్య సయనాసనన్తి ‘‘కతమం మే సేనాసనం పాపుణాతి, కిం అజ్ఝావుత్థం వా అనజ్ఝావుత్థం వా’’తి ఏవం పుచ్ఛితబ్బన్తి అత్థో.

౨౧౫-౬. మఞ్చపీఠాదిదారుభణ్డఞ్చ (చూళవ. ౩౬౦; చూళవ. అట్ఠ. ౩౬౦) రజనభాజనాదిమత్తికాభణ్డఞ్చ. ఆపుచ్ఛాతి భిక్ఖుస్స వా సామణేరస్స వా ఆరామికస్స వా ‘‘ఆవుసో ఇమం జగ్గాహీ’’తి ఆరోచేత్వాతి అత్థో. అఞ్ఞథాతి ఏవం అకత్వాతి అత్థో.

౨౧౭-౮. వుడ్ఢాగన్తుకస్సాతి ఏత్థ (చూళవ. ౩౫౮ ఆదయో; చూళవ. అట్ఠ. ౩౫౯ ఆదయో) దూరతోవ దిస్వా యది ‘‘వుడ్ఢో’’తి జానాతి, తస్మిం అనాగతే ఏవ ఆసనపఞ్ఞాపనాదివత్తం కాతబ్బన్తి అత్థో. పాదోదప్పభుతిన్తి పాదోదకం పాదపీఠం పాదకథలికం ఉపనిక్ఖిపితబ్బన్తి అత్థో. పానీయేన ఆపుచ్ఛన్తేన సచే సకిం ఆనీతం పానీయం సబ్బం పివతి, పునపి ఆపుచ్ఛితబ్బో ఏవ. పఞ్ఞపేతి ‘‘ఏతం తుమ్హాకం సేనాసనం పాపుణాతీ’’తి ఏవం ఆచిక్ఖితబ్బన్తి అత్థో.

౨౧౯-౨౦. ‘‘భిక్ఖాచారగామో ఇతో దూరే’’తి వా ‘‘సన్తికే’’తి వా ‘‘కాలస్సేవ పిణ్డాయ చరితబ్బ’’న్తి వా ‘‘ఉపట్ఠాకే చరితబ్బ’’న్తి వా గోచరో ఆచిక్ఖితబ్బో. అగోచరోతి మిచ్ఛాదిట్ఠికానం వా గామో, పరిచ్ఛిన్నభిక్ఖకో వా గామో, యత్థ ఏకస్స వా ద్విన్నం వా భిక్ఖా దీయతి, సో ఆచిక్ఖితబ్బోతి అత్థో. కతికన్తి సఙ్ఘస్స కతికట్ఠానం. ‘‘ఇమం కాలం పవిసితబ్బం, ఇమం కాలం నిక్ఖమితబ్బ’’న్తి ఏవం పవేసననిక్ఖమనకాలం ఆచిక్ఖితబ్బం. కేసుచి ఠానేసు అమనుస్సా వా వాళా వా హోన్తి, తస్మా ఏవం ఆచిక్ఖితబ్బమేవ. నిసిన్నోవాతి ఇదం ఆపత్తిఅభావమత్తదీపకం, ఉట్ఠహిత్వాపి సబ్బం కాతుం వట్టతేవ. వత్తవినిచ్ఛయో.

వత్తనిద్దేసవణ్ణనా నిట్ఠితా.