౩౧. వికప్పనానిద్దేసవణ్ణనా

౨౨౧. సమ్ముఖాయాతి (పాచి. ౩౭౪; పారా. అట్ఠ. ౨.౪౬౯; కఙ్ఖా. అట్ఠ. వికప్పనసిక్ఖాపదవణ్ణనా) సమ్ముఖే ఠితస్సాతి అత్థో. బ్యత్తస్సాతి వికప్పనవిధానం పచ్చుద్ధరణాదివిధానఞ్చ జానన్తస్స. అబ్యత్తో పన ‘‘ఇమినా మయ్హం దిన్న’’న్తి గహేత్వాపి గచ్ఛేయ్యాతి అత్థో. ఏకస్సాతి ఏకస్స భిక్ఖుస్స.

౨౨౨. నిధేతుంవాతి నిధేతుం ఏవ, నిస్సగ్గియం న హోతీతి అత్థో. పరిభుఞ్జితుం వా విస్సజ్జేతుం వా అధిట్ఠాతుం వా న వట్టతీతి అత్థో.

౨౨౪-౫. అపరా సమ్ముఖా వాతి సమ్ముఖా వికప్పనా ఏవాతి అత్థో. ఇమా ద్వే వికప్పనా అత్తనా ఏవ వికప్పేత్వా పరేన పచ్చుద్ధరాపితత్తా సమ్ముఖా వికప్పనా ఏవాతి వుత్తా.

౨౨౭. మిత్తోతి దళ్హమిత్తో. సన్దిట్ఠోతి దిట్ఠమత్తో నాతిదళ్హమిత్తో. ‘‘ఇతరేన చ పుబ్బే వుత్తనయేన ‘తిస్సో భిక్ఖూ’తి వా ‘తిస్సా భిక్ఖునీ’తి వా వత్తబ్బం. పున తేన ‘అహం తిస్సస్స భిక్ఖునో, తిస్సాయ భిక్ఖునియా వా దమ్మీ’తి వికప్పేత్వా తేనేవ ‘తిస్సస్స భిక్ఖునో, తిస్సాయ భిక్ఖునియా సన్తకం పరిభుఞ్జ వా విస్సజ్జేహి వా యథాపచ్చయం వా కరోహీ’తి పచ్చుద్ధరితబ్బ’’న్తి ఏవం పాఠో గహేతబ్బో.

౨౨౮. దూరసన్తికత్తేకత్త-బహుభావం విజానియాతి ఏత్థ దూరత్తఞ్చ సన్తికత్తఞ్చ ఏకత్తఞ్చ బహుభావఞ్చ విజానిత్వాతి అత్థో.

౨౨౯. ‘‘దసాహపరమం అతిరేకచీవరం ధారేతబ్బ’’న్తి (పారా. ౪౬౨) వుత్తత్తా ‘‘దసాహం వా’’తి వుత్తం. ‘‘చీవరకాలసమయో నామ అనత్థతే కథినే వస్సానస్స పచ్ఛిమో మాసో, అత్థతే కథినే పఞ్చ మాసా’’తి (పారా. ౬౪౯) వుత్తత్తా ‘‘మాసమేకం వా పఞ్చ వా’’తి వుత్తం, మాసం వా ఏకం పఞ్చ వా మాసేతి అత్థో. ‘‘భిక్ఖునో పనేవ అకాలచీవరం ఉప్పజ్జేయ్య, ఆకఙ్ఖమానేన భిక్ఖునా పటిగ్గహేతబ్బం. పటిగ్గహేత్వా ఖిప్పమేవ కారేతబ్బం. నో చస్స పారిపూరి, మాసపరమం తేన భిక్ఖునా తం చీవరం నిక్ఖిపితబ్బం ఊనస్స పారిపూరియా సతియా పచ్చాసాయా’’తి (పారా. ౪౯౯) వుత్తత్తా ‘‘పచ్చాసా సతి మాసక’’న్తి వుత్తం. నుప్పాదయతీతి అనధిట్ఠితం అవికప్పితం నిస్సగ్గిం న జనయతీతి అత్థో. వికప్పనావినిచ్ఛయో.

వికప్పనానిద్దేసవణ్ణనా నిట్ఠితా.