౨౯. మిచ్ఛాజీవవివజ్జనానిద్దేసవణ్ణనా

౨౦౯. చుణ్ణన్తి సిరీసచుణ్ణాదికన్తి అత్థో. మత్తికాతి పకతిమత్తికా వా పఞ్చవణ్ణా వా సుద్ధా కుఙ్కుట్ఠఆదికా వా. కులసఙ్గహాతి ఏతేహి సఙ్గహితానం సన్తికే లాభాసాయ కులసఙ్గహత్థన్తి అత్థో. ఏత్థ పన ఇమేహి సఙ్గహితానం సన్తికే ‘‘కిఞ్చి లభిస్సామీ’’తి సఙ్ఘికం వా పుగ్గలికం వా దాతుం న వట్టతి ఏవ. ఇమినా పన నయేన లద్ధం పఞ్చన్నమ్పి సహధమ్మికానం న వట్టతి, మిచ్ఛాజీవఞ్చ హోతి.

౨౧౦-౨౧౧. లాభాసాయ దాయకానం దారకే ఉక్ఖిపిత్వా పరిభటభావో పారిభటకతా, తాయ పారిభటకతాయ న జీవయేతి సమ్బన్ధో. సేసేసుపి ఏసేవ నయో. ఖేత్తాదీసు పేసితస్స గమనం పహేణకమ్మం. సాసనప్పటిసాసనహరణం దూతకమ్మం. పేసితస్స గేహతో గేహగమనం జఙ్ఘపేసనియం. లాభాసాయ లఞ్జదానమనుప్పదానం. అఞ్ఞేన వాపీతి అఙ్గవిజ్జాదినా.

౨౧౨. విఞ్ఞత్తీతి (పారా. ౫౧౫ ఆదయో; పారా. అట్ఠ. ౨.౫౧౫ ఆదయో) అఞ్ఞాతకవిఞ్ఞత్తి. అనేసనాతి పుబ్బే వుత్తేన పుప్ఫదానాదినా పచ్చయేసనా. కుహనాదీహీతి (విభ. ౮౬౧; విభ. అట్ఠ. ౮౬౧; మహాని. ౮౭) కుహనా లపనా నేమిత్తకతా నిప్పేసికతా లాభేన లాభం నిజిగీసనతాతి ఇమేహి పఞ్చహి వత్థూహీతి అత్థో. మిచ్ఛాజీవవినిచ్ఛయో.

మిచ్ఛాజీవవివజ్జనానిద్దేసవణ్ణనా నిట్ఠితా.