౨౭. అసంవాసికనిద్దేసవణ్ణనా

౧౯౮. ఉక్ఖిత్తోతి ఆపత్తియా అదస్సనే, అప్పటికమ్మే, పాపికాయ దిట్ఠియా అప్పటినిస్సగ్గే వా ఉక్ఖిత్తకోతి తివిధోపి ఇధ ఉక్ఖిత్తో గహితో. అనుపసమ్పన్నోతి ఇమినా సిక్ఖమానసామణేరసామణేరీసిక్ఖాపచ్చక్ఖాతకా గహితాతి వేదితబ్బా. ఛిన్నమూలకో నామ అన్తిమవత్థుం అజ్ఝాపన్నకో. నానాసంవాసోతి లద్ధినానాసంవాసకో. ‘‘నానాసీమాయ ఠితచతుత్థో కమ్మం కరేయ్య, ఇద్ధియా వేహాసే ఠితచతుత్థో కమ్మం కరేయ్య, అకమ్మం న చ కరణీయ’’న్తి హి వుత్తత్తా ఇమేపి ‘‘అసంవాసికా’’తి వుత్తా. ఏతేసు పన ఉక్ఖిత్తకేహి సద్ధిం ఉపోసథాదీని కరోన్తో పాచిత్తియం ఆపజ్జతి. నిస్సీమట్ఠవేహాసట్ఠేహి కరోన్తస్స కమ్మం కుప్పతి, దుక్కటఞ్చ హోతి, ఇతరేహి దుక్కటం. అసంవాసికవినిచ్ఛయో.

అసంవాసికనిద్దేసవణ్ణనా నిట్ఠితా.