౨౧. చమ్మనిద్దేసవణ్ణనా

౧౭౩. ఇదాని ‘‘అనుజానామి, భిక్ఖవే, సబ్బపచ్చన్తిమేసు జనపదేసు చమ్మాని అత్థరణాని ఏళకచమ్మం అజచమ్మం మిగచమ్మ’’న్తి (మహావ. ౨౫౯) ఏవం వుత్తచమ్మాని దస్సేతుం ‘‘మిగాజేళకచమ్మానీ’’తిఆదిమాహ. పరిభుఞ్జితున్తి (మహావ. అట్ఠ. ౨౬౨) మఞ్చాదీసు యత్థ కత్థచి అత్థరిత్వా నిపజ్జితుం వా నిసీదితుం వా వట్టన్తీతి అత్థో. రోహితేణీపసదా చ కురుఙ్గా చ చ-సద్దేన అఞ్ఞేపి వాళమిగా మిగమాతుకాదయోపి మిగజాతికా ఏవాతి అధిప్పాయో.

౧౭౪. అనుఞ్ఞాతత్తయా అఞ్ఞన్తి –

‘‘మక్కటో కాళసీహో చ, సరభో కదలీమిగో;

యే చ వాళమిగా కేచి, తేసం చమ్మం న వట్టతీ’’తి. –

ఏత్థ వాళమిగగ్గహణేన వుత్తావసేసా అన్తమసో గోమహింసాదయో గహితాతి వేదితబ్బా. థవికాతి ఉపాహనకోసకసత్థకోసకకుఞ్చికకోసకాతి వేదితబ్బా, న పత్తత్థవికాదయో. చమ్మవినిచ్ఛయో.

చమ్మనిద్దేసవణ్ణనా నిట్ఠితా.