౨౨. ఉపాహననిద్దేసవణ్ణనా

౧౭౫. గుణఙ్గుణూపాహనాతి (మహావ. అట్ఠ. ౨౪౫) చతుపటలతో పట్ఠాయ వుచ్చతి, న ఏకద్వితిపటలతో పట్ఠాయ ‘‘అనుజానామి, భిక్ఖవే, ఏకపలాసికం ఉపాహనం, న భిక్ఖవే దిగుణా ఉపాహనా ధారేతబ్బా, న తిగుణా ఉపాహనా ధారేతబ్బా, న గుణఙ్గుణూపాహనా ధారేతబ్బా, యో ధారేయ్య, ఆపత్తి దుక్కటస్సా’’తి (మహావ. ౨౪౫) వుత్తత్తా. ‘‘అనుజానామి, భిక్ఖవే, ఓముక్కం గుణఙ్గుణూపాహనం, న భిక్ఖవే నవా గుణఙ్గుణూపాహనా ధారేతబ్బా, యో ధారేయ్య, ఆపత్తి దుక్కటస్సా’’తి (మహావ. ౨౪౭) వుత్తత్తా ‘‘నవా’’తి వుత్తం. సబ్బత్థాపి మజ్ఝిమదేసే గిలానోపి నవం గుణఙ్గుణూపాహనం న లభతి, ఏకవారమ్పి అఞ్ఞేహి పరిభుత్తం ఓముక్కఉపాహనసఙ్ఖాతం లభతి, పచ్చన్తిమేసు జనపదేసు గిలానో నవమ్పి లభతీతి వేదితబ్బం ‘‘అనుజానామి, భిక్ఖవే, సబ్బపచ్చన్తిమేసు జనపదేసు గుణఙ్గుణూపాహన’’న్తి (మహావ. ౨౫౯) అవిసేసేన వుత్తత్తా.

సబ్బస్సాతి గిలానస్సాపి అగిలానస్సాపీతి అత్థో. మజ్ఝిమదేసేపి పచ్చన్తిమదేసేపి ఆరామే ఆరామూపచారే గిలానస్సాపి అగిలానస్సాపి ‘‘అనుజానామి, భిక్ఖవే, అజ్ఝారామే ఉపాహనం ధారేతు’’న్తి (మహావ. ౨౪౯) వుత్తత్తా కప్పియన్తి అత్థో. సబ్బత్థాతి ఆరామేపి గామేపి. అకల్లకస్సాతి గిలానస్స. ఏత్థ పన మజ్ఝిమదేసే గిలానస్స గుణఙ్గుణూపాహనా పరిభుత్తావ ఆరామేపి గామేపి వట్టతి, పచ్చన్తిమదేసే అపరిభుత్తాపి. మజ్ఝిమదేసేపి పచ్చన్తిమదేసేపి భగవతా గిలానస్సేవ ఉపాహనా అనుఞ్ఞాతా ‘‘అనుజానామి, భిక్ఖవే, యస్స పాదా వా దుక్ఖా, పాదా వా ఫలితా, పాదఖిలో వా ఆబాధో, ఉపాహనం ధారేతు’’న్తి (మహావ. ౨౪౯) చ ‘‘అనుజానామి, భిక్ఖవే, గిలానేన భిక్ఖునా సఉపాహనేన గామం పవిసితు’’న్తి (మహావ. ౨౫౬) వుత్తత్తా చ. మజ్ఝిమదేసే చ గిలానో నవం గుణఙ్గుణూపాహనం ధారేతుం యది లభతి, కథం పదేసపఞ్ఞత్తి హోతీతి? సబ్బత్థ పన భగవతా గిలానస్సేవ ఉపాహనా అనుఞ్ఞాతా, తస్మా మజ్ఝిమదేసే గిలానో నవం గుణఙ్గుణూపాహనం లభతీతి గహేతబ్బన్తి వదన్తి.

౧౭౬-౯. సబ్బావ నీలకా (మహావ. ౨౪౬; మహావ. అట్ఠ. ౨౪౬) సబ్బనీలకా. ఏస నయో సబ్బత్థ ఓదాతకాదీసుపి. ఓదాతం పన నేవ పాళియం, న అట్ఠకథాయం పటిక్ఖిత్తం, అనులోమవసేన పన ఇధ పటిక్ఖిత్తన్తి వేదితబ్బం. మహారఙ్గరత్తా సతపదిపిట్ఠివణ్ణా. మహానామరఙ్గరత్తా మన్దరత్తా. మఞ్జేట్ఠికా కణవేరపుప్ఫవణ్ణా. పుప్ఫలతాదీహి విచిత్తా చిత్రా. నీలపీతాదివద్ధికాతి ఏత్థ ఆది-సద్దేన ఓదాతలోహితమఞ్జేట్ఠికమహారఙ్గమహానామరఙ్గరత్తాదివసేన వద్ధికా గహితా. సీహబ్యగ్ఘుద్దాజినదీపీనం చమ్మేహి చాతి సమ్బన్ధో. కోచీతి గిలానోపి అగిలానోపి.

౧౮౦. సకలం వా ఏకదేసకం వా రజనం చోళేన (మహావ. అట్ఠ. ౨౪౬) పుఞ్ఛిత్వా వళఞ్జేయ్యాతి అత్థో. ఖల్లకాదికం పన సబ్బం హారిత్వా వళఞ్జేతబ్బం. ఉపాహనవినిచ్ఛయో.

ఉపాహననిద్దేసవణ్ణనా నిట్ఠితా.