౧౭. ఆపుచ్ఛకరణనిద్దేసవణ్ణనా

౧౬౧. థేరేనాతి సఙ్ఘత్థేరేన.

౧౬౨. తత్థ తత్థ సన్నిపతితానం సబ్బేసం వుడ్ఢో వుడ్ఢతరో, తస్మిం వుడ్ఢతరాగమే పున ఆపుచ్ఛనం నత్థి. భత్తగ్గే చానుమోదతోతి ఏత్థ దానపతినా యాచితేన దహరేన వుడ్ఢేన అనాపుచ్ఛిత్వా కథేతుం వట్టతీతి వదన్తి.

౧౬౩. ఏకవిహారకేతి ఏకోవరకే వుడ్ఢేన వసన్తో అనాపుచ్ఛా న సజ్ఝాయేయ్యాతి అత్థో. ఉద్దేసం పరిపుచ్ఛఞ్చ నో దదేతి ఉద్దేసం వా పరిపుచ్ఛం వా నో దదేయ్య.

౧౬౪. న వివరేయ్య న థకేయ్య చాతి సమ్బన్ధో. ద్వారం నామ మహావళఞ్జం, తత్థ ఆపుచ్ఛనకిచ్చం నత్థి.

౧౬౫. వుడ్ఢేన చఙ్కమే చఙ్కమన్తోపి యేన వుడ్ఢో, తేన పరివత్తయేతి సమ్బన్ధో. ఆపుచ్ఛకరణవినిచ్ఛయో.

ఆపుచ్ఛకరణనిద్దేసవణ్ణనా నిట్ఠితా.