౧. సహధమ్మికసిక్ఖాపదవణ్ణనా

సహధమ్మికవగ్గస్స పఠమే సహధమ్మికం వుచ్చమానోతి ఇమస్సత్థో దుబ్బచసిక్ఖాపదే వుత్తో. ఏతస్మిం సిక్ఖాపదేతి ఏతస్మిం సిక్ఖాపదే యం వుత్తం, తం న తావ సిక్ఖిస్సామీతి అత్థో. పాచిత్తియన్తి ఏత్థ పన అనాదరియభయా లేసేన ఏవం వదన్తస్స వాచాయ వాచాయ పాచిత్తియం వేదితబ్బం. సిక్ఖమానేనాతి ఓవాదం సిరసా సమ్పటిచ్ఛిత్వా సిక్ఖితుకామేనేవ హుత్వా. అఞ్ఞాతబ్బన్తి ఆజానితబ్బం. పరిపుచ్ఛితబ్బన్తి ‘‘ఇమస్స కో అత్థో’’తి పరిపుచ్ఛితబ్బం. పరిపఞ్హితబ్బన్తి చిన్తేతబ్బం తులయితబ్బం.

కోసమ్బియం ఛన్నత్థేరం ఆరబ్భ ఏవం భణనవత్థుస్మిం పఞ్ఞత్తం, సాధారణపఞ్ఞత్తి, అనాణత్తికం, తికపాచిత్తియం, అనుపసమ్పన్నే తికదుక్కటం, ఉభోహిపి ‘‘ఇదం న సల్లేఖాయా’’తిఆదినా (పాచి. ౪౩౬) నయేనేవ అప్పఞ్ఞత్తేన వుచ్చమానస్సాపి ఏవం వదతో దుక్కటమేవ. ‘‘జానిస్సామి సిక్ఖిస్సామీ’’తి భణన్తస్స, ఉమ్మత్తకాదీనఞ్చ అనాపత్తి. ఉపసమ్పన్నస్స పఞ్ఞత్తేన వచనం, అసిక్ఖితుకామతాయ ఏవం వచనన్తి ఇమానేత్థ ద్వే అఙ్గాని. సముట్ఠానాదీని అదిన్నాదానసదిసాని, ఇదం పన దుక్ఖవేదనన్తి.

సహధమ్మికసిక్ఖాపదవణ్ణనా నిట్ఠితా.