౯. సేనావాససిక్ఖాపదవణ్ణనా

నవమే తతో చే ఉత్తరీతి తిరత్తతో ఉత్తరి చతుత్థదివసే అత్థఙ్గతే సూరియే సేనాయ తిట్ఠతు వా నిసీదతు వా సయతు వా, సచేపి ఆకాసే ఇద్ధియా కఞ్చి ఇరియాపథం కప్పేతి, పాచిత్తియమేవ.

సావత్థియం ఛబ్బగ్గియే ఆరబ్భ అతిరేకతిరత్తం సేనాయ వసనవత్థుస్మిం పఞ్ఞత్తం, సాధారణపఞ్ఞత్తి, అనాణత్తికం, తికపాచిత్తియం, ఊనకతిరత్తే అతిరేకసఞ్ఞినో, వేమతికస్స వా దుక్కటం. ఊనకసఞ్ఞిస్స, తతియాయ రత్తియా పురారుణా నిక్ఖమిత్వా పున వసతో, గిలానస్స వా గిలానకరణీయేన వా వసతో, పటిసేనారుద్ధాయ సేనాయ, కేనచి పలిబుద్ధస్స, ఆపదాసు, ఉమ్మత్తకాదీనఞ్చ అనాపత్తి. తిరత్తాతిక్కమో, సేనాయ సూరియస్స అత్థఙ్గమో, గిలానతాదీనం అభావోతి ఇమానేత్థ తీణి అఙ్గాని. సముట్ఠానాదీని ఏళకలోమసదిసానేవాతి.

సేనావాససిక్ఖాపదవణ్ణనా నిట్ఠితా.