౧౦. ఉయ్యోధికసిక్ఖాపదవణ్ణనా

దసమే ఉగ్గన్త్వా ఉగ్గన్త్వా ఏత్థ యుజ్ఝన్తీతి ఉయ్యోధికం, సమ్పహారట్ఠానస్సేతం నామం. బలస్స అగ్గం జానన్తి ఏత్థాతి బలగ్గం, బలగణనట్ఠానన్తి అత్థో. సేనాయ వియూహం సేనాబ్యూహం, సేనానివేసస్సేతం నామం. అనీకస్స దస్సనం అనీకదస్సనం. అనీకం నామ ‘‘ద్వాదసపురిసో హత్థీ, తిపురిసో అస్సో, చతుప్పురిసో రథో’’తిఇమినా (పాచి. ౩౧౪) లక్ఖణేన తయో హత్థీ పచ్ఛిమకం హత్థానీకం, అస్సానీకరథానీకేసుపి ఏసేవ నయో. చత్తారో పన ఆవుధహత్థా పురిసా పచ్ఛిమకం పత్తానీకం. ఏతేసు యంకిఞ్చి దస్సనాయ గచ్ఛతో పదే పదే దుక్కటం, దస్సనూపచారే ఠత్వా పస్సతో పాచిత్తియం, ఉపచారం పన విజహిత్వా పునప్పునం పస్సతో పయోగే పయోగే పాచిత్తియం. సేసం ఉయ్యుత్తసేనాసిక్ఖాపదే వుత్తనయేనేవ వేదితబ్బం, ఆపత్తిభేదో పనేత్థ నత్థేవాతి.

ఉయ్యోధికసిక్ఖాపదవణ్ణనా నిట్ఠితా.

అచేలకవగ్గో పఞ్చమో.