౪. కాణమాతాసిక్ఖాపదవణ్ణనా

చతుత్థే పూవేహీతి పహేణకత్థాయ పటియత్తేహి అతిరసకమోదకసక్ఖలికాదీహి యేహి కేహిచి ఖజ్జకేహి. మన్థేహీతి పాథేయ్యత్థాయ పటియత్తేహి యేహి కేహిచి సత్తుతిలతణ్డులాదీహి. ద్వత్తిపత్తపూరాతి ముఖవట్టియా హేట్ఠిమలేఖం అనతిక్కన్తా ద్వే వా తయో వా పత్తపూరా. తతో చే ఉత్తరీతి సచేపి తతియం పత్తం థూపీకతం గణ్హాతి, ముఖవట్టియా హేట్ఠిమలేఖతో ఉపరిట్ఠితపూవగణనాయ పాచిత్తియం. ద్వత్తిపత్తపూరే పటిగ్గహేత్వాతి ఏత్థ యేన ద్వే గహితా హోన్తి, తేన బహి భిక్ఖుం దిస్వా ‘‘ఏత్థ మయా ద్వే పత్తపూరా గహితా, త్వం ఏకం గణ్హేయ్యాసీ’’తి వత్తబ్బం, తేనాపి అఞ్ఞం పస్సిత్వా ‘‘పఠమం ఆగతేన ద్వే పత్తపూరా గహితా, మయా ఏకో గహితో, త్వం మా గణ్హీ’’తి వత్తబ్బం. యేన పఠమం ఏకో గహితో, తస్సాపి పరమ్పరారోచనే ఏసేవ నయో. యేన పన సయమేవ తయో గహితా, తేన అఞ్ఞం దిస్వా ‘‘మా ఖో త్వం ఏత్థ పటిగ్గణ్హీతి వత్తబ్బం, అవదన్తస్స దుక్కటం, తం సుత్వా గణ్హన్తస్సాపి దుక్కటమేవ. తతో నీహరిత్వా భిక్ఖూహి సద్ధిం సంవిభజితబ్బన్తి లద్ధట్ఠానతో సబ్బాసన్నం ఆసనసాలం వా విహారం వా యత్థ వా పన నిబద్ధం పటిక్కమతి, తత్థ గన్త్వా ఏకం పత్తపూరం అత్తనో ఠపేత్వా సేసం భిక్ఖుసఙ్ఘస్స దాతబ్బం. యథామిత్తం పన దాతుం న లబ్భతి. యేన ఏకో గహితో, న తేన కిఞ్చి అకామా దాతబ్బం, యథారుచి కాతబ్బం.

సావత్థియం సమ్బహులే భిక్ఖూ ఆరబ్భ న మత్తం జానిత్వా పటిగ్గహణవత్థుస్మిం పఞ్ఞత్తం, సాధారణపఞ్ఞత్తి, అనాణత్తికం, తికపాచిత్తియం, ఊనకద్వత్తిపత్తపూరే అతిరేకసఞ్ఞిస్స వేమతికస్స వా దుక్కటం. ఊనకసఞ్ఞిస్స పన, న పహేణకత్థాయ న పాథేయ్యత్థాయ వా పటియత్తం, తదత్థాయ పటియత్తసేసకం వా, గమనే వా పటిప్పస్సద్ధే, ఞాతకప్పవారితానం వా దేన్తానం, అత్తనో ధనేన గణ్హన్తస్స, ఉమ్మత్తకాదీనఞ్చ అనాపత్తి. వుత్తలక్ఖణపూవమన్థతా, అసేసకతా, అప్పటిప్పస్సద్ధగమనతా, అనఞ్ఞాతకాదితా, అతిరేకప్పటిగ్గహణన్తి ఇమానేత్థ పఞ్చ అఙ్గాని, సముట్ఠానాదీని సఞ్చరిత్తసదిసానేవాతి.

కాణమాతాసిక్ఖాపదవణ్ణనా నిట్ఠితా.