౮. పరఉజ్ఝాపనకసిక్ఖాపదవణ్ణనా

అట్ఠమే దుగ్గహితేన దూపధారితేనాతి యం వుత్తం, తతో అఞ్ఞథా గహితేన చ ఉపధారితేన చ. పరన్తి ‘‘అహం కిరయ్యే అయ్యం న సక్కచ్చం ఉపట్ఠహామీ’’తిఆదినా (పాచి. ౮౬౯) నయేన ఉపసమ్పన్నం ఉజ్ఝాపేన్తియా పాచిత్తియం.

సావత్థియం అఞ్ఞతరం భిక్ఖునిం ఆరబ్భ ఏవం పరం ఉజ్ఝాపనవత్థుస్మిం పఞ్ఞత్తం, తికపాచిత్తియం, అనుపసమ్పన్నాయ తికదుక్కటం, ఉమ్మత్తికాదీనంయేవ అనాపత్తి. దుగ్గహితతా, ఉజ్ఝాపనం, యం ఉజ్ఝాపేతి, తస్సా ఉపసమ్పన్నతాతి ఇమానేత్థ తీణి అఙ్గాని. సముట్ఠానాదీని అదిన్నాదానసదిసాని, ఇదం పన దుక్ఖవేదనన్తి.

పరఉజ్ఝాపనకసిక్ఖాపదవణ్ణనా నిట్ఠితా.