౯. పరఅభిసపనసిక్ఖాపదవణ్ణనా

నవమే అభిసపేయ్యాతి సపథం కరేయ్య. తత్థ ‘‘నిరయే ఉపపజ్జామి, నిరయే ఉపపజ్జతూ’’తిఏవమాదీని వదమానా నిరయేన అభిసపతి నామ, అక్కోసతీతి అత్థో. ‘‘గిహినీ హోమి, గిహినీ హోతూ’’తిఏవమాదీని వదమానా బ్రహ్మచరియేన. తస్సా వాచాయ వాచాయ పాచిత్తియం.

సావత్థియం చణ్డకాళిం ఆరబ్భ ఏవం అభిసపనవత్థుస్మిం పఞ్ఞత్తం, తికపాచిత్తియం, అనుపసమ్పన్నాయ తికదుక్కటం, తిరచ్ఛానయోనియా వా పేత్తివిసయేన వా మనుస్సదోభగ్గేన వా అభిసపనే దుక్కటం. అత్థధమ్మానుసాసనిపురేక్ఖారానం ఉమ్మత్తికాదీనఞ్చ అనాపత్తి. నిరయేన వా బ్రహ్మచరియేన వా అభిసపనం, ఉపసమ్పన్నతా, అత్థధమ్మపురేక్ఖారాదీనం అభావోతి ఇమానేత్థ తీణి అఙ్గాని. సముట్ఠానాదీని అట్ఠమసదిసానేవాతి.

పరఅభిసపనసిక్ఖాపదవణ్ణనా నిట్ఠితా.