(౧) విభఙ్గవారో

౫౩. యా కుసలత్తికే లభన్తి, న తాయేవ వేదనాత్తికాదీసూతి తికపదనానత్తమత్తేన వినా మూలావసానవసేన సదిసతం సన్ధాయ ‘‘న తాయేవా’’తి వుత్తం, న చ కేవలం తికన్తరేయేవ, కుసలత్తికేపి పన యా పటిచ్చవారే లభన్తి, న తాయేవ పచ్చయవారాదీసూతి సబ్బపుచ్ఛాసమాహరణం ఇధ కత్తబ్బమేవ. ధమ్మానులోమపచ్చనీయే చ తికపట్ఠానే వితక్కత్తికపీతిత్తికానం విస్సజ్జనే సబ్బాపేతా విస్సజ్జనం లభన్తీతి ఏత్థ పీతిత్తికగ్గహణం న కాతబ్బం. న హి తత్థ ఏకూనపఞ్ఞాస పుచ్ఛా విస్సజ్జనం లభన్తీతి.

తేన సద్ధిన్తి తేన సహజాతపచ్చయభూతేన సద్ధిన్తి అత్థో దట్ఠబ్బో. ‘‘యావ నిరోధగమనా ఉద్ధం పజ్జతీ’’తి చ ‘‘ఉప్పాదాదయో వా పాపుణాతీ’’తి చ వచనేహి ఖణత్తయసమఙ్గీ ఉప్పజ్జతీతి వుచ్చతీతి అనుఞ్ఞాతం వియ హోతి, ఉప్పాదక్ఖణసమఙ్గీయేవ పన ఏవం వుత్తోతి దట్ఠబ్బో.

యస్మా పన ఏకో ఖన్ధో ఏకస్సాతిఆది ఇధ కుసలవచనేన గహితే ఖన్ధే సన్ధాయ వుత్తం. వేదనాత్తికాదీసు పన ఏకం ఖన్ధం పటిచ్చ ద్విన్నం, ద్వే పటిచ్చ ఏకస్సపి, హేతుదుకాదీసు చ సఙ్ఖారక్ఖన్ధేకదేసం పటిచ్చ సఙ్ఖారక్ఖన్ధేకదేసస్సపి ఉప్పత్తి వుత్తాతి సహ ఉప్పజ్జమానానం సబ్బేసం ధమ్మానం పచ్చయో హోన్తో ఏకేకస్సపి దుకతికాదిభేదానఞ్చ పచ్చయో నామ హోతియేవ, తథా దుకాదిభేదానఞ్చాతి.

‘‘రూపేన సద్ధిం అనుప్పత్తితో ఆరుప్పవిపాకఞ్చ న గహేతబ్బ’’న్తి వుత్తం, తం పన న సబ్బస్మిం ఏతస్మిం వచనే గహేతబ్బం, అథ ఖో ‘‘చిత్తసముట్ఠానఞ్చ రూప’’న్తి ఏత్థేవ. న కేవలఞ్చ ఆరుప్పవిపాకోవ, అథ ఖో లోకుత్తరవిపాకకిరియాబ్యాకతమ్పి ఆరుప్పే ఉప్పజ్జమానం ఏత్థ న గహేతబ్బం. ‘‘విపాకాబ్యాకతం కిరియాబ్యాకతం ఏకం ఖన్ధం పటిచ్చ తయో ఖన్ధా’’తి ఏత్థ పన న కిఞ్చి రూపేన వినా సహ వా ఉప్పజ్జమానం సహేతుకం విపాకకిరియాబ్యాకతం అగ్గహితం నామ అత్థి. తత్థ పన యం రూపేన సహ ఉప్పజ్జతి, తస్స పచ్చయుప్పన్నవిసేసం దస్సేతుం ‘‘చిత్తసముట్ఠానఞ్చ రూప’’న్తి వుత్తం.

‘‘వత్థుం పటిచ్చ ఖన్ధా’’తి ఏత్తకే వత్తబ్బే పచ్చయభూతస్స వత్థుస్స ‘‘కటత్తా చ రూప’’న్తి ఏతస్మిం సామఞ్ఞవచనే పచ్చయుప్పన్నభావేన అగ్గహితతాపత్తిం నివారేతుం ‘‘ఖన్ధే పటిచ్చ వత్థూ’’తి వుత్తం. ఖన్ధే పటిచ్చ వత్థు, వత్థుం పటిచ్చ ఖన్ధాతి వా వత్థుఖన్ధానం అఞ్ఞమఞ్ఞపచ్చయభూతానం పచ్చయభావవిసేసదస్సనత్థం అఞ్ఞమఞ్ఞాపేక్ఖం వచనద్వయం వుత్తం సామఞ్ఞేన గహితమ్పి విసుం ఉద్ధటం.

మహాభూతేపి పటిచ్చ ఉప్పత్తిదస్సనత్తన్తి యం చిత్తసముట్ఠానరూపం కటత్తారూపఞ్చ ఉపాదారూపం ఉపాదారూపగ్గహణేన వినా ‘‘ఖన్ధే పటిచ్చ ఉప్పజ్జతీ’’తి వుత్తం, తస్స మహాభూతేపి పటిచ్చ ఉప్పత్తిదస్సనత్థన్తి అత్థో. ఏతస్మిం పన దస్సనే ఖన్ధపచ్చయసహితాసహితఞ్చ సబ్బం ఉపాదారూపం ఇతో పరేసు సహజాతపచ్చయాదీసు సఙ్గహితన్తి ఇమమత్థం సన్ధాయ ‘‘కటత్తారూపం పటిసన్ధియమ్పీ’’తి పి-సద్దో వుత్తోతి దట్ఠబ్బో.

మహాభూతే పటిచ్చ ఉపాదారూపన్తి వుత్తనయేనాతి ‘‘మహాభూతే పటిచ్చ చిత్తసముట్ఠానం రూపం కటత్తారూపం ఉపాదారూప’’న్తి ఏత్థ అత్థతో అయం నయో వుత్తోతి సన్ధాయాహ.

౫౪. రూపమిస్సకా పహాయాతి యాసు పుచ్ఛాసు రూపేన వినా పచ్చయుప్పన్నం న లబ్భతి, అథ ఖో రూపమిస్సకమేవ లబ్భతి, తా పహాయాతి అధిప్పాయో.

౫౭. ‘‘తిణ్ణం సన్నిపాతా గబ్భస్స అవక్కన్తి హోతీ’’తి వచనతోతి గబ్భసేయ్యకపటిసన్ధియా పఞ్చక్ఖన్ధసబ్భావేన తాయ సమానలక్ఖణా సబ్బాపి పఞ్చవోకారపటిసన్ధి ఓక్కన్తినామకాతి సాధేతి. పరిపుణ్ణధమ్మానం విస్సజ్జనం ఏత్థ అత్థీతి పరిపుణ్ణవిస్సజ్జనా.

ఏత్థ చ ‘‘ఏకం మహాభూతం పటిచ్చ తయో…పే… మహాభూతే పటిచ్చ చిత్తసముట్ఠానం రూపం కటత్తారూపం ఉపాదారూప’’న్తి (పట్ఠా. ౧.౧.౫౩) ఏత్తావతా పఞ్చవోకారే సబ్బం చిత్తకమ్మసముట్ఠానరూపం దస్సితం. అవసేసం పన దస్సేతుం ‘‘బాహిర’’న్తిఆది వుత్తం. తత్థ బాహిరన్తి ఏతేన అనిన్ద్రియబద్ధరూపం దస్సేతి, పున ఆహారసముట్ఠానం ఉతుసముట్ఠానన్తి ఏతేహి సబ్బం ఇన్ద్రియబద్ధం ఆహారఉతుసముట్ఠానరూపం. తత్థ ‘‘ఉతుసముట్ఠానం ఏక’’న్తిఆదినా అసఞ్ఞసత్తానమ్పి ఉతుసముట్ఠానం వుత్తమేవాతి దట్ఠబ్బం. న హి తత్థ తస్స వజ్జనే కారణం అత్థీతి. ఆదిమ్హి పన ‘‘ఏకం మహాభూతం పటిచ్చా’’తిఆది అవిసేసవచనం సహజాతం అరూపమ్పి పచ్చయం హేతాదికే చ పచ్చయే బహుతరే లభన్తం చిత్తసముట్ఠానకటత్తారూపద్వయం సహ సఙ్గణ్హిత్వా వుత్తం, ఏవఞ్చ కత్వా తస్స పరియోసానే ‘‘మహాభూతే పటిచ్చ చిత్తసముట్ఠానరూపం కటత్తారూపం ఉపాదారూప’’న్తి వుత్తం, తస్మా తత్థ కటత్తారూపం చిత్తసముట్ఠానసమ్బన్ధం తంసమానగతికం పఞ్చవోకారే వత్తమానమేవ గహితన్తి అగ్గహితం కటత్తారూపం దస్సేతుం ‘‘అసఞ్ఞసత్తానం ఏకం మహాభూతం పటిచ్చా’’తిఆది వుత్తం, తస్మా ఉపాదారూపం ఇధపి కమ్మపచ్చయవిభఙ్గే వియ ‘‘మహాభూతే పటిచ్చ కటత్తారూపం ఉపాదారూప’’న్తి (పట్ఠా. ౧.౧.౬౩) కటత్తారూపభావవిసిట్ఠం ఉపాదారూపం గహితన్తి దట్ఠబ్బం. న హి వుత్తస్స ఉతుసముట్ఠానస్స పునవచనే పయోజనం అత్థీతి.

కస్మా పన యథా బాహిరాదీసు ‘‘మహాభూతే పటిచ్చ ఉపాదారూప’’న్తి అవిసేసేత్వా ఉపాదారూపం వుత్తం, ఏవం అవత్వా చిత్తకమ్మజఉపాదారూపాని ‘‘చిత్తసముట్ఠానం రూపం కటత్తారూపం ఉపాదారూప’’న్తి హేతుపచ్చయాదీసు సహ ‘‘చిత్తసముట్ఠానం రూపం ఉపాదారూపం అసఞ్ఞసత్తానం…పే… కటత్తారూపం ఉపాదారూప’’న్తి అధిపతిపచ్చయాదీసు విసుం చిత్తసముట్ఠానరూపభావకటత్తారూపభావేహి విసేసేత్వావ వుత్తానీతి? తత్థ బాహిరగ్గహణాదీహి వియ ఏత్థ మహాభూతానం కేనచి అవిసేసితత్తా. అపిచ ఇద్ధిచిత్తనిబ్బత్తానం కమ్మపచ్చయానఞ్చ ఇట్ఠానిట్ఠానం బాహిరరూపాయతనాదీనం చిత్తం కమ్మఞ్చ హేతాదీసు న కోచి పచ్చయో, ఆహారఉతుసముట్ఠానానం పన చిత్తం పచ్ఛాజాతభావేన ఉపత్థమ్భకమేవ, న జనకం, మహాభూతానేవ పన తేసం సహజాతాదిభావేన జనకాని, తస్మా సతిపి చిత్తేన కమ్మేన చ వినా అభావే హేతాదిపచ్చయభూతేహి అరూపేహి ఉప్పజ్జమానాని చిత్తసముట్ఠానరూపకటత్తారూపభూతానేవ ఉపాదారూపాని హోన్తి, న అఞ్ఞానీతి ఇమం విసేసం దస్సేతుం చిత్తకమ్మజేస్వేవ ఉపాదారూపేసు విసేసనం కతం. అఞ్ఞాని వా సమానజాతికేన రూపేన సముట్ఠానాని పాకటవిసేసనానేవాతి న విసేసనం అరహన్తి, ఏతాని పన అసమానజాతికేహి అరూపేహి సముట్ఠితాని విసేసనం అరహన్తీతి విసేసితానీతి వేదితబ్బాని. యథా వా చిత్తకమ్మాని చిత్తకమ్మసముట్ఠానానం సవిసేసేన పచ్చయభావేన పచ్చయా హోన్తి సహజాతాదిపచ్చయభావతో మూలకరణభావతో చ, న ఏవం ఉతుఆహారా తంసముట్ఠానానన్తి చిత్తకమ్మజానేవ విసుం విసేసనం అరహన్తి. ఇతరాని పన మహాభూతవిసేసేనేవ విసేసితాని, ఇధ ఉపాదారూపవిసేసనేన మహాభూతాని వియ. న హి అఞ్ఞతరవిసేసనం ఉభయవిసేసనం న హోతీతి.

౫౮. అఞ్ఞమఞ్ఞపచ్చయే ఖన్ధే పటిచ్చ వత్థు, వత్థుం పటిచ్చ ఖన్ధాతి ఖన్ధవత్థూనం అఞ్ఞమఞ్ఞపచ్చయతాదస్సనేన పుబ్బే విసుం పచ్చయభావేన దస్సితానం ఖన్ధానం ఏకతో పచ్చయభావో దస్సితో హోతీతి ఇమినా అధిప్పాయేనాహ ‘‘చతున్నమ్పి ఖన్ధానం ఏకతో వత్థునా అఞ్ఞమఞ్ఞపచ్చయతం దస్సేతుం వుత్త’’న్తి. ‘‘ఖన్ధే పటిచ్చ వత్థూ’’తి ఇదం పన చతున్నమ్పి ఖన్ధానం ఏకతో పటిచ్చత్థఫరణతాదస్సనత్థం, ‘‘వత్థుం పటిచ్చ ఖన్ధా’’తి వత్థుస్స. న కేవలఞ్చ ఖన్ధానం ఇధేవ, హేతుపచ్చయాదీసుపి అయమేవ నయో. తత్థ సబ్బేసం ఖన్ధానం విసుం పటిచ్చత్థఫరణతం దస్సేత్వా పున ‘‘వత్థుం పటిచ్చ ఖన్ధా’’తి వత్థుస్సపి దస్సితాయ ‘‘ఏకం ఖన్ధఞ్చ వత్థుఞ్చ పటిచ్చ తయో ఖన్ధా’’తిఆదినా ఖన్ధవత్థూనఞ్చ దస్సితాయేవ హోతీతి దట్ఠబ్బా.

కస్మా పనేత్థ ‘‘కుసలం ధమ్మం పటిచ్చ అబ్యాకతో ధమ్మో ఉప్పజ్జతి అఞ్ఞమఞ్ఞపచ్చయా, కుసలే ఖన్ధే పటిచ్చ చిత్తసముట్ఠానా మహాభూతా’’తి ఏవమాది న వుత్తం, నను యదేవ పటిచ్చత్థం ఫరతి, న తేనేవ అఞ్ఞమఞ్ఞపచ్చయేన భవితబ్బం హేతుపచ్చయాదీహి వియ. న హి యం ‘‘ఏకం తయో ద్వే చ ఖన్ధే పటిచ్చా’’తి వుత్తం, తే హేతుపచ్చయభూతా ఏవ హోన్తి. ఏస నయో ఆరమ్మణపచ్చయాదీసుపి. పచ్చయవారే చ ‘‘అబ్యాకతం ధమ్మం పచ్చయా కుసలో ధమ్మో ఉప్పజ్జతి అఞ్ఞమఞ్ఞపచ్చయా’’తి (పట్ఠా. ౧.౧.౨౫౬) వుత్తం, న వత్థు కుసలానం అఞ్ఞమఞ్ఞపచ్చయో హోతి, అథ చ పన తంపచ్చయా ఖన్ధానం అఞ్ఞమఞ్ఞపచ్చయా ఉప్పత్తి వుత్తా ఏవ. యదిపి కుసలా ఖన్ధా మహాభూతానం అఞ్ఞమఞ్ఞపచ్చయా న హోన్తి, తథాపి తే పటిచ్చ తేసం ఉప్పత్తి వత్తబ్బా సియాతి? న వత్తబ్బా ఖన్ధసహజాతానం మహాభూతానం ఖన్ధానం పచ్చయభావాభావతో. అఞ్ఞమఞ్ఞసద్దో హి న హేతాదిసద్దో వియ నిరపేక్ఖో, సహజాతాదిసద్దో వియ వా అఞ్ఞతరాపేక్ఖో, అథ ఖో యథావుత్తేతరేతరాపేక్ఖో. పచ్చయపచ్చయుప్పన్నా చ ఖన్ధా మహాభూతా ఇధ యథావుత్తా భవేయ్యుం, తేసు చ మహాభూతా ఖన్ధానం న కోచి పచ్చయో. యస్స చ సయం పచ్చయో, తతో తేన తన్నిస్సితేన వా అఞ్ఞమఞ్ఞపచ్చయేన ఉప్పజ్జమానం అఞ్ఞమఞ్ఞపచ్చయా ఉప్పజ్జతీతి వత్తబ్బతం అరహతి, యథా ఖన్ధే పటిచ్చ ఖన్ధా, వత్థుం పచ్చయా ఖన్ధా. తస్మా అత్తనో పచ్చయస్స పచ్చయత్తాభావతో తదపేక్ఖత్తా చ అఞ్ఞమఞ్ఞసద్దస్స ఖన్ధే పటిచ్చ పచ్చయా చ మహాభూతానం అఞ్ఞమఞ్ఞపచ్చయా ఉప్పత్తి న వుత్తా, న అఞ్ఞమఞ్ఞపచ్చయా చ వుత్తా. ఖన్ధా పన వత్థుం పచ్చయా ఉప్పజ్జమానా వత్థుస్స పచ్ఛాజాతపచ్చయా హోన్తి, తన్నిస్సితేన చ అఞ్ఞమఞ్ఞపచ్చయేన ఉప్పజ్జన్తి. తస్మా వత్థుం పచ్చయా ఖన్ధానం కుసలాదీనం అఞ్ఞమఞ్ఞపచ్చయా ఉప్పత్తి వుత్తాతి.

౫౯. న సా గహితాతి చక్ఖాయతనాదీని నిస్సయభూతాని పటిచ్చాతి న వుత్తన్తి అధిప్పాయో. నిస్సయపచ్చయభావేన పన న చక్ఖాయతనాదీని ఆరమ్మణపచ్చయభావేన రూపాయతనాదీని వియ న గహితానీతి.

౬౦. ద్వీసు ఉపనిస్సయేసు వత్తబ్బమేవ నత్థి, ఆరమ్మణూపనిస్సయమ్పి పన యే లభన్తి, తేసం వసేన ఆరమ్మణపచ్చయసదిసన్తి ఏవం వుత్తన్తి దస్సేతుం ‘‘తత్థ కిఞ్చాపీ’’తి ఆహ. తత్థ ‘‘న సబ్బే అకుసలా అబ్యాకతా ఆరమ్మణూపనిస్సయం లభన్తీ’’తి పురిమపాఠో. కుసలాపి పన మహగ్గతా ఏకన్తేన, కామావచరా చ కదాచి న లభన్తీతి ‘‘న సబ్బే కుసలాకుసలాబ్యాకతా’’తి పఠన్తి.

౬౧. పురేజాతపచ్చయే యథా అఞ్ఞత్థ పచ్చయం అనిద్దిసిత్వావ దేసనా కతా, ఏవం అకత్వా కస్మా ‘‘వత్థుం పురేజాతపచ్చయా’’తి వుత్తన్తి? నియమసబ్భావా. హేతుఆదీసు హి నియమో నత్థి. న హి తేహి ఉప్పజ్జమానానం అలోభాదీసు కుసలాదీసు రూపాదీసు చ అయమేవ పచ్చయోతి నియమో అత్థి, ఇధ పన వత్థు న వత్థుధమ్మేసు పురేజాతపచ్చయా ఉప్పజ్జమానానం ధమ్మానం నియమతో ఛబ్బిధం వత్థు పురేజాతపచ్చయో హోతీతి ఇమమత్థం దస్సేతుం ఇదం వుత్తం. ఆరమ్మణపురేజాతమ్పి హి వత్థుపురేజాతే అవిజ్జమానే న లబ్భతి, ఏవఞ్చ కత్వా పటిసన్ధివిపాకస్స నపురేజాతపచ్చయా ఏవ ఉప్పత్తి వుత్తా, పచ్చుప్పన్నారమ్మణస్సపి తస్స పురేజాతపచ్చయో న ఉద్ధటో. ‘‘నేవవిపాకనవిపాకధమ్మధమ్మం పటిచ్చ విపాకో ధమ్మో ఉప్పజ్జతి పురేజాతపచ్చయా’’తి ఏతస్సపి అలాభతో తత్థ ‘‘పురేజాతే తీణీ’’తి (పట్ఠా. ౧.౩.౧౨౪) వుత్తన్తి.

౬౩. తథా పటిసన్ధిక్ఖణే మహాభూతానన్తి మహాభూతానం ఏకక్ఖణికనానాక్ఖణికకమ్మపచ్చయవసేనేవ తదుపాదారూపానమ్పి వదతీతి చ దట్ఠబ్బం. కటత్తారూపానన్తి పవత్తియం కటత్తారూపానన్తి అధిప్పాయో.

౬౪. యథాలాభవసేనాతి ఇన్ద్రియరూపేసు యం యం పటిసన్ధియం లబ్భతి, తస్స తస్స వసేన.

౬౯. విప్పయుత్తపచ్చయా ఉప్పజ్జమానానమ్పి కేసఞ్చి నియమతో వత్థు విప్పయుత్తపచ్చయో, కేసఞ్చి ఖన్ధా, న చ సమానవిప్పయుత్తపచ్చయా ఏవ కుసలాదికే పటిచ్చ ఉప్పజ్జమానా ఉప్పజ్జన్తి, అథ ఖో నానావిప్పయుత్తపచ్చయాపి, తస్మా తం విసేసం దస్సేతుం ‘‘వత్థుం విప్పయుత్తపచ్చయా, ఖన్ధే విప్పయుత్తపచ్చయా’’తి తత్థ తత్థ వుత్తం. తత్థ తదాయత్తవుత్తితాయ పచ్చయుప్పన్నో పచ్చయం పచ్చయం కరోతీతి ఇమస్సత్థస్స వసేన ఉపయోగవచనం దట్ఠబ్బం. వత్థుం ఖన్ధే విప్పయుత్తపచ్చయకరణతోతి అయఞ్హేత్థ అత్థో. అట్ఠకథాయం పన ‘‘వత్థుం పటిచ్చ విప్పయుత్తపచ్చయా, వత్థునా విప్పయుత్తపచ్చయతం సాధేన్తేనా’’తి అత్థో వుత్తో, తత్థ కుసలానం ఖన్ధానం వత్థుం పటిచ్చ ఉప్పత్తి నత్థీతి ‘‘వత్థుం పటిచ్చా’’తి న సక్కా వత్తున్తి, ఇదం పన పటిచ్చసద్దేన అయోజేత్వా ‘‘పటిచ్చ ఉప్పజ్జన్తి వత్థుం విప్పయుత్తపచ్చయా’’తి యోజేత్వా తస్సత్థో ‘‘వత్థునా విప్పయుత్తపచ్చయతం సాధేన్తేనా’’తి వుత్తోతి దట్ఠబ్బో. కిం పన పటిచ్చాతి? యం ‘‘ఏకం ఖన్ధ’’న్తిఆదికం పాళియం పటిచ్చాతి వుత్తం. తమేవ అత్థం పాకటం కత్వా ‘‘వత్థుం విప్పయుత్తపచ్చయాతి ఖన్ధే పటిచ్చ ఖన్ధా, వత్థునా విప్పయుత్తపచ్చయతం సాధేన్తేనా’’తి పఠన్తి. అనన్తరత్తా పాకటస్స అబ్యాకతచిత్తసముట్ఠానస్సేవ గహణం మా హోతూతి ‘‘అబ్యాకతచిత్తసముట్ఠానమ్పి కుసలాకుసలచిత్తసముట్ఠానమ్పీ’’తి ఆహ. ఆసన్నమ్పి దూరమ్పి సబ్బన్తి వుత్తం హోతీతి.

౭౧-౭౨. ‘‘ఇమే వీసతి పచ్చయాతి సంఖిపిత్వా దస్సితానం వసేనేతం వుత్త’’న్తి వుత్తం. తత్థ యది ఏకేనపి దేసనం సంఖిత్తం సంఖిత్తమేవ, ఆదిమ్హి పన తయో పచ్చయా విప్పయుత్తపచ్చయో ఏకమ్పి పదం అపరిహాపేత్వా విత్థారితాతి తే చత్తారో పచ్ఛాజాతఞ్చ వజ్జేత్వా ‘‘ఇమే ఏకూనవీసతి పచ్చయా’’తి వత్తబ్బం సియా. ఏత్తకా హి సంఖిపిత్వా దస్సితాతి. యే పన పాళియం విత్థారితం అవిత్థారితఞ్చ సబ్బం సఙ్గహేత్వా వుత్తన్తి వదన్తి, తేసం ‘‘ఇమే తేవీసతి పచ్చయా’’తి పాఠేన భవితబ్బం. ఆదిమ్హి పన తయో పచ్చయే విత్థారితే వజ్జేత్వా యతో పభుతి సఙ్ఖేపో ఆరద్ధో, తతో చతుత్థతో పభుతి సంఖిత్తం విత్థారితఞ్చ సహ గహేత్వా ‘‘ఇమే తేవీసతి పచ్చయా’’తి వుత్తన్తి దట్ఠబ్బం.

విభఙ్గవారవణ్ణనా నిట్ఠితా.