౨. అన్తరాభవకథావణ్ణనా

౫౦౫. అతిదూరస్స అన్తరితస్స పత్తబ్బస్స దేసస్స దస్సనతో దిబ్బచక్ఖుకో వియ. ఆకాసేన పథవన్తరట్ఠానాని భిన్దిత్వా గమనతో ఇద్ధిమా వియ. న సహధమ్మేనాతి యది సో భవానం అన్తరా న సియా, న నామ అన్తరాభవోతి పటిక్ఖేపే కరణం నత్థీతి అధిప్పాయో.

౫౦౬. తత్థ జాతిజరామరణాని చేవ చుతిపటిసన్ధిపరమ్పరఞ్చ అనిచ్ఛన్తోతి ఏతేన చుతిఅనన్తరం అన్తరాభవం ఖన్ధాతి, వత్తమానా జాతీతి, మాతుకుచ్ఛిమేవ పవిట్ఠా అన్తరధాయమానా మరణన్తి న ఇచ్ఛతి.

౫౦౭. యథా కామభవాదీసు తత్థ తత్థేవ పునప్పునం చవిత్వా ఉపపత్తివసేన చుతిపటిసన్ధిపరమ్పరా హోతి, ఏవం తం తత్థ న ఇచ్ఛతీతి దస్సేతి.

అన్తరాభవకథావణ్ణనా నిట్ఠితా.