౫. విజ్జాభాగియసుత్తవణ్ణనా

౩౫. పఞ్చమే సమ్పయోగవసేన విజ్జం భజన్తి, సహజాతఅఞ్ఞమఞ్ఞనిస్సయసమ్పయుత్తఅత్థిఅవిగతాదిపచ్చయవసేన తాయ సహ ఏకీభావం గచ్ఛన్తీతి విజ్జాభాగియా. అథ వా విజ్జాభాగే విజ్జాకోట్ఠాసే వత్తన్తి విజ్జాసభాగతాయ తదేకదేసే విజ్జాకోట్ఠాసే పవత్తన్తీతి విజ్జాభాగియా. తత్థ విపస్సనాఞాణం, మనోమయిద్ధి, ఛ అభిఞ్ఞాతి అట్ఠ విజ్జా. పురిమేన అత్థేన తాహి సమ్పయుత్తధమ్మా విజ్జాభాగియా. పచ్ఛిమేన అత్థేన తాసు యా కాచి ఏకావ విజ్జా విజ్జా, సేసా విజ్జాభాగియా. ఏవం విజ్జాపి విజ్జాయ సమ్పయుత్తధమ్మాపి ‘‘విజ్జాభాగియా’’త్వేవ వేదితబ్బా. ఇధ పన విపస్సనాఞాణసమ్పయుత్తా సఞ్ఞావ విజ్జాభాగియాతి ఆగతా, సఞ్ఞాసీసేన సేససమ్పయుత్తధమ్మాపి వుత్తా ఏవాతి దట్ఠబ్బం. అనిచ్చానుపస్సనాఞాణేతి అనిచ్చానుపస్సనాఞాణే నిస్సయపచ్చయభూతే ఉప్పన్నసఞ్ఞా, తేన సహగతాతి అత్థో. సేసేసుపి ఏసేవ నయో.

విజ్జాభాగియసుత్తవణ్ణనా నిట్ఠితా.