౬-౭. పటిసమ్భిదాప్పత్తసుత్తాదివణ్ణనా

౮౬-౮౭. ఛట్ఠే పటిసమ్భిదాసు యం వత్తబ్బం, తం హేట్ఠా వుత్తమేవ. ఉచ్చావచానీతి ఉచ్చనీచాని. తేనాహ ‘‘మహన్తఖుద్దకానీ’’తి. కింకరణీయానీతి ‘‘కిం కరోమీ’’తి ఏవం వత్వా కత్తబ్బకమ్మాని. తత్థ ఉచ్చకమ్మాని నామ చీవరస్స కరణం, రజనం, చేతియే సుధాకమ్మం, ఉపోసథాగారచేతియఘరబోధిఘరేసు కత్తబ్బకమ్మన్తి ఏవమాది. అవచకమ్మం నామ పాదధోవనమక్ఖనాది ఖుద్దకకమ్మం. తత్రుపాయాసాతి తత్రుపగమనియా, తత్ర తత్ర మహన్తే ఖుద్దకే చ కమ్మే సాధనవసేన ఉపగచ్ఛన్తియాతి అత్థో. తస్స తస్స కమ్మస్స నిప్ఫాదనే సమత్థాయాతి వుత్తం హోతి. తత్రుపాయాయాతి వా తత్ర తత్ర కమ్మే సాధేతబ్బే ఉపాయభూతాయ. అలం కాతున్తి కాతుం సమత్థో హోతి. అలం సంవిధాతున్తి విచారేతుం సమత్థో. సత్తమం ఉత్తానమేవ.

పటిసమ్భిదాప్పత్తసుత్తాదివణ్ణనా నిట్ఠితా.