౯. ధమ్మపదసుత్తవణ్ణనా

౨౯. నవమే ఝానాదిభేదో ధమ్మో పజ్జతి ఏతేనాతి ధమ్మపదం, అనభిజ్ఝావ ధమ్మపదం అనభిజ్ఝాధమ్మపదం, అనభిజ్ఝాపధానో వా ధమ్మకోట్ఠాసో అనభిజ్ఝాధమ్మపదం. ఏవం సేసేసుపి. అత్థతో పన అనభిజ్ఝాధమ్మపదం నామ అలోభో వా అలోభసీసేన అధిగతజ్ఝానవిపస్సనామగ్గఫలనిబ్బానాని వా. అబ్యాపాదో ధమ్మపదం నామ మేత్తా వా మేత్తాసీసేన అధిగతజ్ఝానాదీని వా. సమ్మాసతిధమ్మపదం నామ సూపట్ఠితస్సతి వా సతిసీసేన అధిగతజ్ఝానాదీని వా. సమ్మాసమాధిధమ్మపదం నామ అట్ఠసమాపత్తి వా అట్ఠసమాపత్తిసీసేన అధిగతజ్ఝానవిపస్సనామగ్గఫలనిబ్బానాని వా. దసఅసుభవసేన వా అధిగతజ్ఝానాదీని అనభిజ్జా ధమ్మపదం. చతుబ్రహ్మవిహారవసేన అధిగతాని అబ్యాపాదో ధమ్మపదం. దసానుస్సతి ఆహారేపటికూలసఞ్ఞావసేన అధిగతాని సమ్మాసతిధమ్మపదం. దసకసిణఆనాపానవసేన అధిగతాని సమ్మాసమాధిధమ్మపదం. అనభిజ్ఝాలూతి అనభిజ్ఝాయనసీలో. అభిపుబ్బో ఝేసద్దో అభిజ్ఝాయనట్ఠో. తేనేవాహ ‘‘నిత్తణ్హో హుత్వా’’తి. పకతిభావం అవిజహన్తేనాతి పరిసుద్ధభావం సభావసఙ్ఖాతఅనవజ్జసఙ్ఖాతం పకతిభావం అవిజహన్తేన. సావజ్జధమ్మసముప్పత్తియా హి చిత్తస్స అనవజ్జభావో జహితో హోతీతి.

ధమ్మపదసుత్తవణ్ణనా నిట్ఠితా.