౧౦. ఉపోసథసుత్తవణ్ణనా

౧౯౦. దసమే తుణ్హీభూతం తుణ్హీభూతన్తి ఆమేడితవచనం బ్యాపనిచ్ఛావసేన వుత్తన్తి ఆహ ‘‘యతో యతో అనువిలోకేతీ’’తి. అనువిలోకేత్వాతి ఏత్థ అను-సద్దోపి బ్యాపనిచ్ఛావచనమేవాతి అను అను విలోకేత్వాతి అత్థో, పఞ్చపసాదప్పటిమణ్డితాని అక్ఖీని ఉమ్మీలేత్వా తతో తతో విలోకేత్వాతి వుత్తం హోతి. అలన్తి యుత్తం, ఓపాయికన్తి అత్థో ‘‘అలమేవ నిబ్బిన్దితు’’న్తిఆదీసు (దీ. ని. ౨.౨౭౨; సం. ని. ౨.౧౨౪-౧౨౬) వియ. పుటబన్ధనేన పరిహరిత్వా అసితబ్బం పుటోసం సమ్బలం అ-కారస్స ఓ-కారం కత్వా. తేనాహ ‘‘పాథేయ్య’’న్తి. సేసమేత్థ సువిఞ్ఞేయ్యమేవ.

ఉపోసథసుత్తవణ్ణనా నిట్ఠితా.

బ్రాహ్మణవగ్గవణ్ణనా నిట్ఠితా.