౧౦. సుగతవినయసుత్తవణ్ణనా

౧౬౦. దసమే వళఞ్జేన్తీతి సజ్ఝాయన్తి చేవ వాచుగ్గతం కరోన్తా ధారేన్తి చ. అవిగతతణ్హతాయ తం తం పరిక్ఖారజాతం బహుమ్పి ఆదియన్తీతి బహులా, తే ఏవ బాహులికా యథా ‘‘వేనయికో’’తి (మ. ని. ౧.౨౪౬; అ. ని. ౮.౧౧; పారా. ౮). తే పన యస్మా పచ్చయబహులభావా యుత్తప్పయుత్తా నామ హోన్తి, తస్మా ఆహ ‘‘పచ్చయబాహుల్లాయ పటిపన్నా’’తి. సిథిలం గణ్హన్తీతి సాథలికా, సిక్ఖాయ ఆదరగారవాభావేన సిథిలం అదళ్హం గణ్హన్తీతి అత్థో. సిథిలన్తి చ భావనపుంసకనిద్దేసో, సిథిల-సద్దేన వా సమానత్థస్స సాథలసద్దస్స వసేన సాథలికాతి పదసిద్ధి వేదితబ్బా. అవగమనతోతి అధోగమనతో, ఓరమ్భాగియభావతోతి అత్థో. నిబ్బీరియాతి ఉజ్ఝితుస్సాహా తదధిగమాయ ఆరమ్భమ్పి అకురుమానా.

సుగతవినయసుత్తవణ్ణనా నిట్ఠితా.

ఇన్ద్రియవగ్గవణ్ణనా నిట్ఠితా.