౭. వచ్ఛగోత్తసుత్తవణ్ణనా

౫౮. సత్తమే మహావిపాకన్తి ఉళారఫలం బహువిపాకం. ధమ్మో నామ కథితకథా ‘‘అత్థం దహతి విదహతీ’’తి కత్వా. అనుధమ్మో నామ పటికథనం ‘‘తం అనుగతో ధమ్మో’’తి కత్వా. సహ ధమ్మేనాతి సహధమ్మో, సో ఏవ సహధమ్మికో. ధమ్మసద్దో చేత్థ కారణపరియాయోతి ఆహ ‘‘సకారణో’’తి. వాదస్సాతి వచనస్స. అనుపాతో అనుపచ్ఛా పవత్తి.

పరిపన్థే తిట్ఠతీతి పారిపన్థికో. పన్థే ఠత్వా పరేసం సాపతేయ్యం ఛిన్దనతో పన్థదూహనచోరో. యది పచ్చవేక్ఖణఞాణం, కథం తం అసేక్ఖన్తి ఆహ ‘‘అసేక్ఖస్స పవత్తత్తా’’తి. ఇతరానీతి సీలక్ఖన్ధాదీని. సయమ్పీతి పి-సద్దో ‘‘అసేక్ఖస్స పవత్తా చా’’తి ఇమమత్థం సమ్పిణ్డేతి.

నిబ్బిసేవనోతి విసేవనరహితో విగతవిలోమభావో. న ఉపపరిక్ఖన్తీతి న విచారేన్తి. జాతిం నిబ్బత్తిం యాతి ఉపగచ్ఛతీతి జాతియో, జాతోతి అత్థో. తేనాహ ‘‘యత్థ కత్థచి కులజాతే’’తి.

కేవలీతి కేవలవా, పారిపూరిమాతి అత్థో. తేనాహ ‘‘పరిపుణ్ణభావేన యుత్తో’’తి. ఏతం కేవలీతి పదం. అభిఞ్ఞాపారన్తి అభిజానస్స పారం. పరియన్తం గతత్తా పారగూ. ఏస నయో సేసపదేసుపి. ఖేత్తవినిచ్ఛయసవనేనాతి ‘‘ఇమేహి సీలాదిగుణసమ్పన్నా సదేవకే లోకే పుఞ్ఞస్స ఖేత్తం, తదఞ్ఞో న ఖేత్త’’న్తి ఏవం ఖేత్తవినిచ్ఛయసవనేన రహితా.

వచ్ఛగోత్తసుత్తవణ్ణనా నిట్ఠితా.