౨. సారణీయసుత్తవణ్ణనా

౧౨. దుతియే చతుపారిసుద్ధిసీలమ్పి పబ్బజ్జానిస్సితమేవాతి ఇమినా పబ్బజ్జూపగతసమనన్తరమేవ చతుపారిసుద్ధిసీలమ్పి సమాదిన్నమేవ హోతీతి దస్సేతి. మగ్గసన్నిస్సితానేవ హోన్తీతి మగ్గాధిగమత్థాయ పటిపజ్జితబ్బత్తా కసిణపరికమ్మాదీని మగ్గసన్నిస్సితానేవ హోన్తి, తస్మా మగ్గగ్గహణేనేవ తేసమ్పి గహణం వేదితబ్బం, తేహి వినా మగ్గాధిగమస్స అసమ్భవతోతి అధిప్పాయో.

అగ్గమగ్గాధిగమేన అసమ్మోహప్పటివేధస్స సిఖాపత్తత్తా మగ్గధమ్మేసు వియ ఫలధమ్మేసుపి సాతిసయో అసమ్మోహోతి ‘‘సయం అభిఞ్ఞా’’తి వుత్తం, సామం జానిత్వాతి అత్థో. తథా జాననా పనస్స సచ్ఛికరణం అత్తపచ్చక్ఖకిరియాతి ‘‘సచ్ఛికత్వా’’తి వుత్తం. తేనాహ ‘‘అత్తనావ అభివిసిట్ఠాయ పఞ్ఞాయ పచ్చక్ఖం కత్వా’’తి. తథా సచ్ఛికిరియా చస్స అత్తని పటిలాభోతి ‘‘ఉపసమ్పజ్జా’’తి వుత్తన్తి ఆహ ‘‘పటిలభిత్వా’’తి.

సారణీయసుత్తవణ్ణనా నిట్ఠితా.