౫-౭. పఠమఆజానీయసుత్తాదివణ్ణనా

౯౭-౯౯. పఞ్చమే అనుచ్ఛవికోతి రఞ్ఞో పరిభుఞ్జనయోగ్గో. హత్థపాదాదిఅఙ్గసమతాయాతి హత్థపాదాదిఅవయవసమతాయ, రఞ్ఞో వా సేనాయ అఙ్గభూతత్తా రఞ్ఞో అఙ్గన్తి వుచ్చతి. ఆనేత్వా హునితబ్బన్తి ఆహునం, ఆహుతీతి అత్థతో ఏకన్తి ఆహ ‘‘ఆహుతిసఙ్ఖాతం పిణ్డపాత’’న్తి. దూరతోపి ఆనేత్వా సీలవన్తేసు దాతబ్బస్సేతం అధివచనం. పిణ్డపాతన్తి చ నిదస్సనమత్తం. ఆనేత్వా హునితబ్బానఞ్హి చీవరాదీనం చతున్నం పచ్చయానమేతం అధివచనం ఆహునన్తి. తం అరహతీతి ఆహునేయ్యో. పటిగ్గహేతుం యుత్తోతి తస్స మహప్ఫలభావకరణతో పటిగ్గణ్హితుం అనుచ్ఛవికో.

పాహునకభత్తస్సాతి దిసవిదిసతో ఆగతానం పియమనాపానం ఞాతిమిత్తానం అత్థాయ సక్కారే పటియత్తస్స ఆగన్తుకభత్తస్స. తఞ్హి ఠపేత్వా తే తథారూపే పాహునకే సఙ్ఘస్సేవ దాతుం యుత్తం, సఙ్ఘోవ తం పటిగ్గహేతుం యుత్తో. సఙ్ఘసదిసో హి పాహునకో నత్థి. తథా హేస ఏకస్మిం బుద్ధన్తరే వీతివత్తే దిస్సతి, కదాచి అసఙ్ఖ్యేయ్యేపి కప్పే వీతివత్తే. అబ్బోకిణ్ణఞ్చ పియమనాపతాదికరేహి ధమ్మేహి సమన్నాగతో. ఏవం పాహునమస్స దాతుం యుత్తం, పాహునఞ్చ పటిగ్గహేతుం యుత్తోతి పాహునేయ్యో. అయఞ్హేత్థ అధిప్పాయో ‘‘ఞాతిమిత్తా విప్పవుట్ఠా న చిరస్సేవ సమాగచ్ఛన్తి, అనవట్ఠితా చ తేసు పియమనాపతా, న ఏవమరియసఙ్ఘో, తస్మా సఙ్ఘోవ పాహునేయ్యో’’తి.

దక్ఖన్తి ఏతాయ సత్తా యథాధిప్పేతాహి సమ్పత్తీహి వడ్ఢన్తీతి దక్ఖిణా, పరలోకం సద్దహిత్వా దానం. తం దక్ఖిణం అరహతి, దక్ఖిణాయ వా హితో యస్మా మహప్ఫలకరణతాయ విసోధేతీతి దక్ఖిణేయ్యో.

పుఞ్ఞత్థికేహి అఞ్జలి కరణీయో ఏత్థాతి అఞ్జలికరణీయో. ఉభో హేత్థ సిరసి పతిట్ఠాపేత్వా సబ్బలోకేన కయిరమానం అఞ్జలికమ్మం అరహతీతి వా అఞ్జలికరణీయో. తేనాహ ‘‘అఞ్జలిపగ్గహణస్స అనుచ్ఛవికో’’తి.

యదిపి పాళియం ‘‘అనుత్తర’’న్తి వుత్తం, నత్థి ఇతో ఉత్తరం విసిట్ఠన్తి హి అనుత్తరం, సమమ్పిస్స పన నత్థీతి దస్సేన్తో ‘‘అసదిస’’న్తి ఆహ. ఖిత్తం వుత్తం బీజం మహప్ఫలభావకరణేన తాయతి రక్ఖతి, ఖిపన్తి వపన్తి ఏత్థ బీజానీతి వా ఖేత్తం, కేదారాది, ఖేత్తం వియ ఖేత్తం, పుఞ్ఞానం ఖేత్తం పుఞ్ఞక్ఖేత్తం. యథా హి రఞ్ఞో వా అమచ్చస్స వా సాలీనం వా యవానం వా విరుహనట్ఠానం ‘‘రఞ్ఞో సాలిక్ఖేతం యవక్ఖేత’’న్తి వుచ్చతి, ఏవం సఙ్ఘో సబ్బలోకస్స పుఞ్ఞానం విరుహనట్ఠానం. సఙ్ఘం నిస్సాయ హి లోకస్స నానప్పకారహితసుఖసంవత్తనికాని పుఞ్ఞాని విరుహన్తి, తస్మా సఙ్ఘో అనుత్తరం పుఞ్ఞక్ఖేత్తం లోకస్స. సేసం సువిఞ్ఞేయ్యమేవ. ఛట్ఠసత్తమాని ఉత్తానత్థానేవ.

పఠమఆజానీయసుత్తాదివణ్ణనా నిట్ఠితా.