౯. ఏకధమ్మసుత్తం

౨౧౦. ‘‘నాహం, భిక్ఖవే, అఞ్ఞం ఏకధమ్మమ్పి సమనుపస్సామి, యో ఏవం భావితో బహులీకతో సంయోజనీయానం ధమ్మానం పహానాయ సంవత్తతి, యథయిదం, భిక్ఖవే, సత్త బోజ్ఝఙ్గా. కతమే సత్త? సతిసమ్బోజ్ఝఙ్గో…పే… ఉపేక్ఖాసమ్బోజ్ఝఙ్గో. కథం భావితా చ, భిక్ఖవే, సత్త బోజ్ఝఙ్గా కథం బహులీకతా సంయోజనీయానం ధమ్మానం పహానాయ సంవత్తన్తి?

‘‘ఇధ, భిక్ఖవే, భిక్ఖు సతిసమ్బోజ్ఝఙ్గం భావేతి వివేకనిస్సితం…పే… ఉపేక్ఖాసమ్బోజ్ఝఙ్గం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం. ఏవం భావితా ఖో, భిక్ఖవే, సత్త బోజ్ఝఙ్గా ఏవం బహులీకతా సంయోజనీయానం ధమ్మానం పహానాయ సంవత్తన్తి.

‘‘కతమే చ, భిక్ఖవే, సంయోజనీయా ధమ్మా? చక్ఖు, భిక్ఖవే, సంయోజనీయో ధమ్మో. ఏత్థేతే ఉప్పజ్జన్తి సంయోజనవినిబన్ధా అజ్ఝోసానా…పే… జివ్హా సంయోజనీయా ధమ్మా. ఏత్థేతే ఉప్పజ్జన్తి సంయోజనవినిబన్ధా అజ్ఝోసానా…పే… మనో సంయోజనీయో ధమ్మో. ఏత్థేతే ఉప్పజ్జన్తి సంయోజనవినిబన్ధా అజ్ఝోసానా. ఇమే వుచ్చన్తి, భిక్ఖవే, సంయోజనీయా ధమ్మా’’తి. నవమం.