౪. కూటాగారసుత్తం

౧౧౧౪. ‘‘యో హి, భిక్ఖవే [యో చ ఖో భిక్ఖవే (స్యా. క.)], ఏవం వదేయ్య – ‘అహం దుక్ఖం అరియసచ్చం యథాభూతం అనభిసమేచ్చ…పే… దుక్ఖనిరోధగామినిం పటిపదం అరియసచ్చం యథాభూతం అనభిసమేచ్చ సమ్మా దుక్ఖస్సన్తం కరిస్సామీ’తి – నేతం ఠానం విజ్జతి.

‘‘సేయ్యథాపి, భిక్ఖవే, యో ఏవం వదేయ్య – ‘అహం కూటాగారస్స హేట్ఠిమం ఘరం అకరిత్వా ఉపరిమం ఘరం ఆరోపేస్సామీ’తి – నేతం ఠానం విజ్జతి; ఏవమేవ ఖో, భిక్ఖవే, యో ఏవం వదేయ్య – ‘అహం దుక్ఖం అరియసచ్చం యథాభూతం అనభిసమేచ్చ…పే… దుక్ఖనిరోధగామినిం పటిపదం అరియసచ్చం యథాభూతం అనభిసమేచ్చ సమ్మా దుక్ఖస్సన్తం కరిస్సామీ’తి – నేతం ఠానం విజ్జతి.

‘‘యో చ ఖో, భిక్ఖవే, ఏవం వదేయ్య – ‘అహం దుక్ఖం అరియసచ్చం యథాభూతం అభిసమేచ్చ…పే… దుక్ఖనిరోధగామినిం పటిపదం అరియసచ్చం యథాభూతం అభిసమేచ్చ సమ్మా దుక్ఖస్సన్తం కరిస్సామీ’తి – ఠానమేతం విజ్జతి.

‘‘సేయ్యథాపి, భిక్ఖవే, యో ఏవం వదేయ్య – ‘అహం కూటాగారస్స హేట్ఠిమం ఘరం కరిత్వా ఉపరిమం ఘరం ఆరోపేస్సామీ’తి – ఠానమేతం విజ్జతి; ఏవమేవ ఖో, భిక్ఖవే, యో ఏవం వదేయ్య – ‘అహం దుక్ఖం అరియసచ్చం యథాభూతం అభిసమేచ్చ…పే… దుక్ఖనిరోధగామినిం పటిపదం అరియసచ్చం యథాభూతం అభిసమేచ్చ సమ్మా దుక్ఖస్సన్తం కరిస్సామీ’తి – ఠానమేతం విజ్జతి.

‘‘తస్మాతిహ, భిక్ఖవే, ‘ఇదం దుక్ఖ’న్తి యోగో కరణీయో…పే… ‘అయం దుక్ఖనిరోధగామినీ పటిపదా’తి యోగో కరణీయో’’తి. చతుత్థం.