౫. దుతియదారుక్ఖన్ధోపమసుత్తం

౨౪౨. ఏకం సమయం భగవా కిమిలాయం [కిమ్బిలాయం (సీ. పీ.), కిమ్మిలాయం (స్యా. కం.)] విహరతి గఙ్గాయ నదియా తీరే. అద్దసా ఖో భగవా మహన్తం దారుక్ఖన్ధం గఙ్గాయ నదియా సోతేన వుయ్హమానం. దిస్వాన భిక్ఖూ ఆమన్తేసి – ‘‘పస్సథ నో తుమ్హే, భిక్ఖవే, అముం మహన్తం దారుక్ఖన్ధం గఙ్గాయ నదియా సోతేన వుయ్హమాన’’న్తి? ‘‘ఏవం భన్తే’’…పే… ఏవం వుత్తే, ఆయస్మా కిమిలో భగవన్తం ఏతదవోచ – కిం ను ఖో, భన్తే, ఓరిమం తీరం…పే… కతమో చ, కిమిల, అన్తోపూతిభావో. ఇధ, కిమిల, భిక్ఖు అఞ్ఞతరం సంకిలిట్ఠం ఆపత్తిం ఆపన్నో హోతి యథారూపాయ ఆపత్తియా న వుట్ఠానం పఞ్ఞాయతి. అయం వుచ్చతి, కిమిల, అన్తోపూతిభావోతి. పఞ్చమం.