౩౯. అజ్ఝత్తపచ్చుప్పన్నయదనిచ్చసుత్తం

౨౦౬. ‘‘చక్ఖు, భిక్ఖవే, అనిచ్చం పచ్చుప్పన్నం. యదనిచ్చం, తం దుక్ఖం. యం దుక్ఖం, తదనత్తా. యదనత్తా తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం…పే… జివ్హా అనిచ్చా పచ్చుప్పన్నా. యదనిచ్చం, తం దుక్ఖం. యం దుక్ఖం, తదనత్తా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం…పే… మనో అనిచ్చో పచ్చుప్పన్నో. యదనిచ్చం తం దుక్ఖం. యం దుక్ఖం తదనత్తా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం. ఏవం పస్సం…పే… నాపరం ఇత్థత్తాయాతి పజానాతీ’’తి.