౧౭. సట్ఠిపేయ్యాలవగ్గో

౧. అజ్ఝత్తఅనిచ్చఛన్దసుత్తం

౧౬౮. ‘‘యం, భిక్ఖవే, అనిచ్చం, తత్ర వో ఛన్దో పహాతబ్బో. కిఞ్చ, భిక్ఖవే, అనిచ్చం? చక్ఖు, భిక్ఖవే, అనిచ్చం; తత్ర వో ఛన్దో పహాతబ్బో…పే… జివ్హా అనిచ్చా; తత్ర వో ఛన్దో పహాతబ్బో…పే… మనో అనిచ్చో; తత్ర వో ఛన్దో పహాతబ్బో. యం, భిక్ఖవే, అనిచ్చం, తత్ర వో ఛన్దో పహాతబ్బో’’తి.

౨. అజ్ఝత్తఅనిచ్చరాగసుత్తం

౧౬౯. ‘‘యం, భిక్ఖవే, అనిచ్చం, తత్ర వో రాగో పహాతబ్బో. కిఞ్చ, భిక్ఖవే, అనిచ్చం? చక్ఖు, భిక్ఖవే, అనిచ్చం; తత్ర వో రాగో పహాతబ్బో…పే… జివ్హా అనిచ్చా; తత్ర వో రాగో పహాతబ్బో…పే… మనో అనిచ్చో; తత్ర వో రాగో పహాతబ్బో. యం, భిక్ఖవే, అనిచ్చం, తత్ర వో రాగో పహాతబ్బో’’తి.

౩. అజ్ఝత్తఅనిచ్చఛన్దరాగసుత్తం

౧౭౦. ‘‘యం, భిక్ఖవే, అనిచ్చం, తత్ర వో ఛన్దరాగో పహాతబ్బో. కిఞ్చ, భిక్ఖవే, అనిచ్చం? చక్ఖు, భిక్ఖవే, అనిచ్చం; తత్ర వో ఛన్దరాగో పహాతబ్బో…పే… జివ్హా అనిచ్చా; తత్ర వో ఛన్దరాగో పహాతబ్బో…పే… మనో అనిచ్చో; తత్ర వో ఛన్దరాగో పహాతబ్బో. యం, భిక్ఖవే, అనిచ్చం, తత్ర వో ఛన్దరాగో పహాతబ్బో’’తి.

౪-౬. దుక్ఖఛన్దాదిసుత్తం

౧౭౧-౧౭౩. ‘‘యం, భిక్ఖవే, దుక్ఖం, తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. కిఞ్చ, భిక్ఖవే, దుక్ఖం? చక్ఖు, భిక్ఖవే, దుక్ఖం; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో…పే… జివ్హా దుక్ఖా…పే… మనో దుక్ఖో; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. యం, భిక్ఖవే, దుక్ఖం తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో’’తి.

౭-౯. అనత్తఛన్దాదిసుత్తం

౧౭౪-౧౭౬. ‘‘యో, భిక్ఖవే, అనత్తా, తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. కో చ, భిక్ఖవే, అనత్తా? చక్ఖు, భిక్ఖవే, అనత్తా; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో…పే… జివ్హా అనత్తా; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో…పే… మనో అనత్తా; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. యో, భిక్ఖవే, అనత్తా తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో’’తి.

౧౦-౧౨. బాహిరానిచ్చఛన్దాదిసుత్తం

౧౭౭-౧౭౯. ‘‘యం, భిక్ఖవే, అనిచ్చం, తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. కిఞ్చ, భిక్ఖవే, అనిచ్చం? రూపా, భిక్ఖవే, అనిచ్చా; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. సద్దా అనిచ్చా; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. గన్ధా అనిచ్చా; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. రసా అనిచ్చా; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. ఫోట్ఠబ్బా అనిచ్చా; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. ధమ్మా అనిచ్చా; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. యం, భిక్ఖవే, అనిచ్చం తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో’’తి.

౧౩-౧౫. బాహిరదుక్ఖఛన్దాదిసుత్తం

౧౮౦-౧౮౨. ‘‘యం, భిక్ఖవే, దుక్ఖం, తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. కిఞ్చ, భిక్ఖవే, దుక్ఖం? రూపా, భిక్ఖవే, దుక్ఖా; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. సద్దా… గన్ధా… రసా… ఫోట్ఠబ్బా… ధమ్మా దుక్ఖా; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. యం, భిక్ఖవే, దుక్ఖం, తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో’’తి.

౧౬-౧౮. బాహిరానత్తఛన్దాదిసుత్తం

౧౮౩-౧౮౫. ‘‘యో, భిక్ఖవే, అనత్తా, తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. కో చ, భిక్ఖవే, అనత్తా? రూపా, భిక్ఖవే, అనత్తా; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. సద్దా… గన్ధా… రసా… ఫోట్ఠబ్బా… ధమ్మా అనత్తా; తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. యో, భిక్ఖవే, అనత్తా తత్ర వో ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో’’తి.

౧౯. అజ్ఝత్తాతీతానిచ్చసుత్తం

౧౮౬. ‘‘చక్ఖు, భిక్ఖవే, అనిచ్చం అతీతం…పే… జివ్హా అనిచ్చా అతీతా…పే… మనో అనిచ్చో అతీతో. ఏవం పస్సం, భిక్ఖవే, సుతవా అరియసావకో చక్ఖుస్మిమ్పి నిబ్బిన్దతి…పే… జివ్హాయపి నిబ్బిన్దతి…పే… మనస్మిమ్పి నిబ్బిన్దతి. నిబ్బిన్దం విరజ్జతి; విరాగా విముచ్చతి; విముత్తస్మిం విముత్తమితి ఞాణం హోతి. ‘ఖీణా జాతి, వుసితం బ్రహ్మచరియం, కతం కరణీయం, నాపరం ఇత్థత్తాయా’తి పజానాతీ’’తి.

౨౦. అజ్ఝత్తానాగతానిచ్చసుత్తం

౧౮౭. ‘‘చక్ఖు, భిక్ఖవే, అనిచ్చం అనాగతం…పే… జివ్హా అనిచ్చా అనాగతా…పే… మనో అనిచ్చో అనాగతో. ఏవం పస్సం…పే… నాపరం ఇత్థత్తాయాతి పజానాతీ’’తి.

౨౧. అజ్ఝత్తపచ్చుప్పన్నానిచ్చసుత్తం

౧౮౮. ‘‘చక్ఖు, భిక్ఖవే, అనిచ్చం పచ్చుప్పన్నం…పే… జివ్హా అనిచ్చా పచ్చుప్పన్నా…పే… మనో అనిచ్చో పచ్చుప్పన్నో. ఏవం పస్సం…పే… నాపరం ఇత్థత్తాయాతి పజానాతీ’’తి.

౨౨-౨౪. అజ్ఝత్తాతీతాదిదుక్ఖసుత్తం

౧౮౯-౧౯౧. ‘‘చక్ఖు, భిక్ఖవే, దుక్ఖం అతీతం అనాగతం పచ్చుప్పన్నం…పే… జివ్హా దుక్ఖా అతీతా అనాగతా పచ్చుప్పన్నా…పే… మనో దుక్ఖో అతీతో అనాగతో పచ్చుప్పన్నో. ఏవం పస్సం, భిక్ఖవే…పే… నాపరం ఇత్థత్తాయాతి పజానాతీ’’తి.

౨౫-౨౭. అజ్ఝత్తాతీతాదిఅనత్తసుత్తం

౧౯౨-౧౯౪. ‘‘చక్ఖు, భిక్ఖవే, అనత్తా అతీతం అనాగతం పచ్చుప్పన్నం…పే… జివ్హా అనత్తా…పే… మనో అనత్తా అతీతో అనాగతో పచ్చుప్పన్నో. ఏవం పస్సం…పే… నాపరం ఇత్థత్తాయాతి పజానాతీ’’తి.

౨౮-౩౦. బాహిరాతీతాదిఅనిచ్చసుత్తం

౧౯౫-౧౯౭. ‘‘రూపా, భిక్ఖవే, అనిచ్చా అతీతా అనాగతా పచ్చుప్పన్నా. సద్దా… గన్ధా… రసా… ఫోట్ఠబ్బా… ధమ్మా అనిచ్చా అతీతా అనాగతా పచ్చుప్పన్నా. ఏవం పస్సం…పే… నాపరం ఇత్థత్తాయాతి పజానాతీ’’తి.

౩౧-౩౩. బాహిరాతీతాదిదుక్ఖసుత్తం

౧౯౮-౨౦౦. ‘‘రూపా, భిక్ఖవే, దుక్ఖా అతీతా అనాగతా పచ్చుప్పన్నా. సద్దా… గన్ధా… రసా… ఫోట్ఠబ్బా… ధమ్మా దుక్ఖా అతీతా అనాగతా పచ్చుప్పన్నా. ఏవం పస్సం…పే… నాపరం ఇత్థత్తాయాతి పజానాతీ’’తి.

౩౪-౩౬. బాహిరాతీతాదిఅనత్తసుత్తం

౨౦౧-౨౦౩. ‘‘రూపా, భిక్ఖవే, అనత్తా అతీతా అనాగతా పచ్చుప్పన్నా. సద్దా… గన్ధా… రసా… ఫోట్ఠబ్బా… ధమ్మా అనత్తా అతీతా అనాగతా పచ్చుప్పన్నా. ఏవం పస్సం…పే… నాపరం ఇత్థత్తాయాతి పజానాతీ’’తి.

౩౭. అజ్ఝత్తాతీతయదనిచ్చసుత్తం

౨౦౪. ‘‘చక్ఖు, భిక్ఖవే, అనిచ్చం అతీతం. యదనిచ్చం, తం దుక్ఖం. యం దుక్ఖం, తదనత్తా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం…పే… జివ్హా అనిచ్చా అతీతా. యదనిచ్చం, తం దుక్ఖం. యం దుక్ఖం, తదనత్తా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం…పే… మనో అనిచ్చో అతీతో. యదనిచ్చం, తం దుక్ఖం. యం దుక్ఖం, తదనత్తా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం. ఏవం పస్సం…పే… నాపరం ఇత్థత్తాయాతి పజానాతీ’’తి.

౩౮. అజ్ఝత్తానాగతయదనిచ్చసుత్తం

౨౦౫. ‘‘చక్ఖు, భిక్ఖవే, అనిచ్చం అనాగతం. యదనిచ్చం, తం దుక్ఖం. యం దుక్ఖం, తదనత్తా. యదనత్తా తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం…పే… జివ్హా అనిచ్చా అనాగతా. యదనిచ్చం, తం దుక్ఖం. యం దుక్ఖం, తదనత్తా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం…పే… మనో అనిచ్చో అనాగతో. యదనిచ్చం, తం దుక్ఖం. యం దుక్ఖం, తదనత్తా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం. ఏవం పస్సం, భిక్ఖవే…పే… నాపరం ఇత్థత్తాయాతి పజానాతీ’’తి.

౩౯. అజ్ఝత్తపచ్చుప్పన్నయదనిచ్చసుత్తం

౨౦౬. ‘‘చక్ఖు, భిక్ఖవే, అనిచ్చం పచ్చుప్పన్నం. యదనిచ్చం, తం దుక్ఖం. యం దుక్ఖం, తదనత్తా. యదనత్తా తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం…పే… జివ్హా అనిచ్చా పచ్చుప్పన్నా. యదనిచ్చం, తం దుక్ఖం. యం దుక్ఖం, తదనత్తా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం…పే… మనో అనిచ్చో పచ్చుప్పన్నో. యదనిచ్చం తం దుక్ఖం. యం దుక్ఖం తదనత్తా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం. ఏవం పస్సం…పే… నాపరం ఇత్థత్తాయాతి పజానాతీ’’తి.

౪౦-౪౨. అజ్ఝత్తాతీతాదియందుక్ఖసుత్తం

౨౦౭-౨౦౯. ‘‘చక్ఖు, భిక్ఖవే, దుక్ఖం అతీతం అనాగతం పచ్చుప్పన్నం. యం దుక్ఖం, తదనత్తా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం…పే… జివ్హా దుక్ఖా…పే… మనో దుక్ఖో అతీతో అనాగతో పచ్చుప్పన్నో. యం దుక్ఖం, తదనత్తా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం. ఏవం పస్సం…పే… నాపరం ఇత్థత్తాయాతి పజానాతీ’’తి.

౪౩-౪౫. అజ్ఝత్తాతీతాదియదనత్తసుత్తం

౨౧౦-౨౧౨. ‘‘చక్ఖు, భిక్ఖవే, అనత్తా అతీతం అనాగతం పచ్చుప్పన్నం. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం…పే… జివ్హా అనత్తా…పే… మనో అనత్తా అతీతో అనాగతో పచ్చుప్పన్నో. యదనత్తా తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం. ఏవం పస్సం…పే… నాపరం ఇత్థత్తాయాతి పజానాతీ’’తి.

౪౬-౪౮. బాహిరాతీతాదియదనిచ్చసుత్తం

౨౧౩-౨౧౫. ‘‘రూపా, భిక్ఖవే, అనిచ్చా అతీతా అనాగతా పచ్చుప్పన్నా. యదనిచ్చం, తం దుక్ఖం. యం దుక్ఖం, తదనత్తా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం. సద్దా… గన్ధా… రసా… ఫోట్ఠబ్బా… ధమ్మా అనిచ్చా అతీతా అనాగతా పచ్చుప్పన్నా. యదనిచ్చం తం దుక్ఖం. యం దుక్ఖం తదనత్తా. యదనత్తా తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం. ఏవం పస్సం…పే… నాపరం ఇత్థత్తాయాతి పజానాతీ’’తి.

౪౯-౫౧. బాహిరాతీతాదియందుక్ఖసుత్తం

౨౧౬-౨౧౮. ‘‘రూపా, భిక్ఖవే, దుక్ఖా అతీతా అనాగతా పచ్చుప్పన్నా. యం దుక్ఖం, తదనత్తా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం. సద్దా… గన్ధా… రసా… ఫోట్ఠబ్బా… ధమ్మా దుక్ఖా అతీతా అనాగతా పచ్చుప్పన్నా. యం దుక్ఖం, తదనత్తా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం. ఏవం పస్సం…పే… నాపరం ఇత్థత్తాయాతి పజానాతీ’’తి.

౫౨-౫౪. బాహిరాతీతాదియదనత్తసుత్తం

౨౧౯-౨౨౧. ‘‘రూపా, భిక్ఖవే, అనత్తా అతీతా అనాగతా పచ్చుప్పన్నా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం. సద్దా… గన్ధా… రసా… ఫోట్ఠబ్బా… ధమ్మా అనత్తా అతీతా అనాగతా పచ్చుప్పన్నా. యదనత్తా, తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం. ఏవం పస్సం…పే… నాపరం ఇత్థత్తాయాతి పజానాతీ’’తి.

౫౫. అజ్ఝత్తాయతనఅనిచ్చసుత్తం

౨౨౨. ‘‘చక్ఖు, భిక్ఖవే, అనిచ్చం…పే… జివ్హా అనిచ్చా…పే… మనో అనిచ్చో. ఏవం పస్సం…పే… నాపరం ఇత్థత్తాయాతి పజానాతీ’’తి.

౫౬. అజ్ఝత్తాయతనదుక్ఖసుత్తం

౨౨౩. ‘‘చక్ఖు, భిక్ఖవే, దుక్ఖం…పే… జివ్హా దుక్ఖా…పే… మనో దుక్ఖో. ఏవం పస్సం…పే… నాపరం ఇత్థత్తాయాతి పజానాతీ’’తి.

౫౭. అజ్ఝత్తాయతనఅనత్తసుత్తం

౨౨౪. ‘‘చక్ఖు, భిక్ఖవే, అనత్తా…పే… జివ్హా అనత్తా…పే… మనో అనత్తా. ఏవం పస్సం…పే… నాపరం ఇత్థత్తాయాతి పజానాతీ’’తి.

౫౮. బాహిరాయతనఅనిచ్చసుత్తం

౨౨౫. ‘‘రూపా, భిక్ఖవే, అనిచ్చా. సద్దా… గన్ధా… రసా… ఫోట్ఠబ్బా… ధమ్మా అనిచ్చా. ఏవం పస్సం…పే… నాపరం ఇత్థత్తాయాతి పజానాతీ’’తి.

౫౯. బాహిరాయతనదుక్ఖసుత్తం

౨౨౬. ‘‘రూపా, భిక్ఖవే, దుక్ఖా. సద్దా… గన్ధా… రసా… ఫోట్ఠబ్బా… ధమ్మా దుక్ఖా. ఏవం పస్సం…పే… నాపరం ఇత్థత్తాయాతి పజానాతీ’’తి.

౬౦. బాహిరాయతనఅనత్తసుత్తం

౨౨౭. ‘‘రూపా, భిక్ఖవే, అనత్తా. సద్దా… గన్ధా… రసా… ఫోట్ఠబ్బా… ధమ్మా అనత్తా. ఏవం పస్సం…పే… నాపరం ఇత్థత్తాయాతి పజానాతీ’’తి.

సట్ఠిపేయ్యాలవగ్గో సత్తరసమో.

తస్సుద్దానం –

ఛన్దేనట్ఠారస హోన్తి, అతీతేన చ ద్వే నవ;

యదనిచ్చాట్ఠారస వుత్తా, తయో అజ్ఝత్తబాహిరా;

పేయ్యాలో సట్ఠికో వుత్తో, బుద్ధేనాదిచ్చబన్ధునాతి.

సుత్తన్తాని సట్ఠి.