౧౨. అత్తానుదిట్ఠిపహానసుత్తం

౧౬౭. అథ ఖో అఞ్ఞతరో భిక్ఖు…పే… ఏతదవోచ – ‘‘కథం ను ఖో, భన్తే, జానతో కథం పస్సతో అత్తానుదిట్ఠి పహీయతీ’’తి? ‘‘చక్ఖుం ఖో, భిక్ఖు, అనత్తతో జానతో పస్సతో అత్తానుదిట్ఠి పహీయతి. రూపే అనత్తతో జానతో పస్సతో అత్తానుదిట్ఠి పహీయతి. చక్ఖువిఞ్ఞాణం అనత్తతో జానతో పస్సతో అత్తానుదిట్ఠి పహీయతి. చక్ఖుసమ్ఫస్సం అనత్తతో జానతో పస్సతో అత్తానుదిట్ఠి పహీయతి. యమ్పిదం చక్ఖుసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా తమ్పి అనత్తతో జానతో పస్సతో అత్తానుదిట్ఠి పహీయతి…పే… జివ్హం అనత్తతో జానతో పస్సతో అత్తానుదిట్ఠి పహీయతి…పే… మనం అనత్తతో జానతో పస్సతో అత్తానుదిట్ఠి పహీయతి. ధమ్మే… మనోవిఞ్ఞాణం… మనోసమ్ఫస్సం… యమ్పిదం మనోసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా తమ్పి అనత్తతో జానతో పస్సతో అత్తానుదిట్ఠి పహీయతీ’’తి. ద్వాదసమం.

నన్దిక్ఖయవగ్గో సోళసమో.

తస్సుద్దానం –

నన్దిక్ఖయేన చత్తారో, జీవకమ్బవనే దువే;

కోట్ఠికేన తయో వుత్తా, మిచ్ఛా సక్కాయ అత్తనోతి.