౧౧. సక్కాయదిట్ఠిపహానసుత్తం

౧౬౬. అథ ఖో అఞ్ఞతరో భిక్ఖు…పే… ఏతదవోచ – ‘‘కథం ను ఖో, భన్తే, జానతో కథం పస్సతో సక్కాయదిట్ఠి పహీయతీ’’తి? ‘‘చక్ఖుం ఖో, భిక్ఖు, దుక్ఖతో జానతో పస్సతో సక్కాయదిట్ఠి పహీయతి. రూపే దుక్ఖతో జానతో పస్సతో సక్కాయదిట్ఠి పహీయతి. చక్ఖువిఞ్ఞాణం దుక్ఖతో జానతో పస్సతో సక్కాయదిట్ఠి పహీయతి. చక్ఖుసమ్ఫస్సం దుక్ఖతో జానతో పస్సతో సక్కాయదిట్ఠి పహీయతి…పే… యమ్పిదం మనోసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా తమ్పి దుక్ఖతో జానతో పస్సతో సక్కాయదిట్ఠి పహీయతి. ఏవం ఖో, భిక్ఖు, జానతో ఏవం పస్సతో సక్కాయదిట్ఠి పహీయతీ’’తి. ఏకాదసమం.