౫. పఠమనతుమ్హాకంసుత్తం

౧౩౮. ‘‘యం, భిక్ఖవే, న తుమ్హాకం తం పజహథ. తం వో పహీనం హితాయ సుఖాయ భవిస్సతి. కిఞ్చ, భిక్ఖవే, న తుమ్హాకం? చక్ఖు, భిక్ఖవే, న తుమ్హాకం; తం పజహథ. తం వో పహీనం హితాయ సుఖాయ భవిస్సతి…పే… జివ్హా న తుమ్హాకం; తం పజహథ. సా వో పహీనా హితాయ సుఖాయ భవిస్సతి…పే… మనో న తుమ్హాకం; తం పజహథ. సో వో పహీనో హితాయ సుఖాయ భవిస్సతి. సేయ్యథాపి, భిక్ఖవే, యం ఇమస్మిం జేతవనే తిణకట్ఠసాఖాపలాసం తం జనో హరేయ్య వా డహేయ్య వా యథాపచ్చయం వా కరేయ్య, అపి ను తుమ్హాకం ఏవమస్స – ‘అమ్హే జనో హరతి వా డహతి వా యథాపచ్చయం వా కరోతీ’’’తి? ‘‘నో హేతం, భన్తే’’. ‘‘తం కిస్స హేతు’’? ‘‘న హి నో ఏతం, భన్తే, అత్తా వా అత్తనియం వా’’తి. ‘‘ఏవమేవ ఖో, భిక్ఖవే, చక్ఖు న తుమ్హాకం; తం పజహథ. తం వో పహీనం హితాయ సుఖాయ భవిస్సతి…పే… జివ్హా న తుమ్హాకం; తం పజహథ. సా వో పహీనా హితాయ సుఖాయ భవిస్సతి…పే… మనో న తుమ్హాకం; తం పజహథ. సో వో పహీనో హితాయ సుఖాయ భవిస్సతీ’’తి. పఞ్చమం.