౯. సంయోజనియధమ్మసుత్తం

౧౨౨. ‘‘సంయోజనియే చ, భిక్ఖవే, ధమ్మే దేసేస్సామి సంయోజనఞ్చ. తం సుణాథ. కతమే చ, భిక్ఖవే, సంయోజనియా ధమ్మా, కతమఞ్చ సంయోజనం? సన్తి, భిక్ఖవే, చక్ఖువిఞ్ఞేయ్యా రూపా ఇట్ఠా కన్తా మనాపా పియరూపా కామూపసంహితా రజనీయా. ఇమే వుచ్చన్తి, భిక్ఖవే, సంయోజనియా ధమ్మా. యో తత్థ ఛన్దరాగో, తం తత్థ సంయోజనం…పే… సన్తి, భిక్ఖవే, జివ్హావిఞ్ఞేయ్యా రసా…పే… సన్తి, భిక్ఖవే, మనోవిఞ్ఞేయ్యా ధమ్మా ఇట్ఠా కన్తా మనాపా పియరూపా కామూపసంహితా రజనీయా. ఇమే వుచ్చన్తి, భిక్ఖవే, సంయోజనియా ధమ్మా. యో తత్థ ఛన్దరాగో తం తత్థ సంయోజన’’న్తి. నవమం.