౧. యోగక్ఖేమిసుత్తం

౧౦౪. సావత్థినిదానం. ‘‘యోగక్ఖేమిపరియాయం వో, భిక్ఖవే, ధమ్మపరియాయం దేసేస్సామి. తం సుణాథ. కతమో చ, భిక్ఖవే, యోగక్ఖేమిపరియాయో ధమ్మపరియాయో? సన్తి, భిక్ఖవే, చక్ఖువిఞ్ఞేయ్యా రూపా ఇట్ఠా కన్తా మనాపా పియరూపా కామూపసంహితా రజనీయా. తే తథాగతస్స పహీనా ఉచ్ఛిన్నమూలా తాలావత్థుకతా అనభావఙ్కతా ఆయతిం అనుప్పాదధమ్మా. తేసఞ్చ పహానాయ అక్ఖాసి యోగం, తస్మా తథాగతో ‘యోగక్ఖేమీ’తి వుచ్చతి…పే… సన్తి, భిక్ఖవే, మనోవిఞ్ఞేయ్యా ధమ్మా ఇట్ఠా కన్తా మనాపా పియరూపా కామూపసంహితా రజనీయా. తే తథాగతస్స పహీనా ఉచ్ఛిన్నమూలా తాలావత్థుకతా అనభావఙ్కతా ఆయతిం అనుప్పాదధమ్మా. తేసఞ్చ పహానాయ అక్ఖాసి యోగం, తస్మా తథాగతో ‘యోగక్ఖేమీ’తి వుచ్చతి. అయం ఖో, భిక్ఖవే, యోగక్ఖేమిపరియాయో ధమ్మపరియాయో’’తి. పఠమం.