౧౦. ఉదకసుత్తం

౧౦౩. ‘‘ఉదకో [ఉద్దకో (సీ. పీ.)] సుదం, భిక్ఖవే, రామపుత్తో ఏవం వాచం భాసతి – ‘ఇదం జాతు వేదగూ, ఇదం జాతు సబ్బజీ [సబ్బజి (పీ.)], ఇదం జాతు అపలిఖతం గణ్డమూలం పలిఖణి’న్తి. తం ఖో పనేతం, భిక్ఖవే, ఉదకో రామపుత్తో అవేదగూయేవ సమానో ‘వేదగూస్మీ’తి భాసతి, అసబ్బజీయేవ సమానో ‘సబ్బజీస్మీ’తి భాసతి, అపలిఖతంయేవ గణ్డమూలం పలిఖతం మే ‘గణ్డమూల’న్తి భాసతి. ఇధ ఖో తం, భిక్ఖవే, భిక్ఖు సమ్మా వదమానో వదేయ్య – ‘ఇదం జాతు వేదగూ, ఇదం జాతు సబ్బజీ, ఇదం జాతు అపలిఖతం గణ్డమూలం పలిఖణి’’’న్తి.

‘‘కథఞ్చ, భిక్ఖవే, వేదగూ హోతి? యతో ఖో, భిక్ఖవే, భిక్ఖు ఛన్నం ఫస్సాయతనానం సముదయఞ్చ అత్థఙ్గమఞ్చ అస్సాదఞ్చ ఆదీనవఞ్చ నిస్సరణఞ్చ యథాభూతం పజానాతి; ఏవం ఖో, భిక్ఖవే, భిక్ఖు వేదగూ హోతి.

‘‘కథఞ్చ, భిక్ఖవే, భిక్ఖు సబ్బజీ హోతి? యతో ఖో, భిక్ఖవే, భిక్ఖు ఛన్నం ఫస్సాయతనానం సముదయఞ్చ అత్థఙ్గమఞ్చ అస్సాదఞ్చ ఆదీనవఞ్చ నిస్సరణఞ్చ యథాభూతం విదిత్వా అనుపాదావిముత్తో హోతి; ఏవం ఖో, భిక్ఖవే, భిక్ఖు సబ్బజీ హోతి.

‘‘కథఞ్చ, భిక్ఖవే, భిక్ఖునో అపలిఖతం గణ్డమూలం పలిఖతం హోతి? గణ్డోతి ఖో, భిక్ఖవే, ఇమస్సేతం చాతుమహాభూతికస్స కాయస్స అధివచనం మాతాపేత్తికసమ్భవస్స ఓదనకుమ్మాసూపచయస్స అనిచ్చుచ్ఛాదనపరిమద్దనభేదనవిద్ధంసనధమ్మస్స. గణ్డమూలన్తి ఖో, భిక్ఖవే, తణ్హాయేతం అధివచనం. యతో ఖో, భిక్ఖవే, భిక్ఖునో తణ్హా పహీనా హోతి ఉచ్ఛిన్నమూలా తాలావత్థుకతా అనభావఙ్కతా ఆయతిం అనుప్పాదధమ్మా; ఏవం ఖో, భిక్ఖవే, భిక్ఖునో అపలిఖతం గణ్డమూలం పలిఖతం హోతి.

‘‘ఉదకో సుదం, భిక్ఖవే, రామపుత్తో ఏవం వాచం భాసతి – ‘ఇదం జాతు వేదగూ, ఇదం జాతు సబ్బజీ, ఇదం జాతు అపలిఖతం గణ్డమూలం పలిఖణి’న్తి. తం ఖో పనేతం, భిక్ఖవే, ఉదకో రామపుత్తో అవేదగూయేవ సమానో ‘వేదగూస్మీ’తి భాసతి, అసబ్బజీయేవ సమానో ‘సబ్బజీస్మీ’తి భాసతి; అపలిఖతంయేవ గణ్డమూలం ‘పలిఖతం మే గణ్డమూల’న్తి భాసతి. ఇధ ఖో తం, భిక్ఖవే, భిక్ఖు సమ్మా వదమానో వదేయ్య – ‘ఇదం జాతు వేదగూ, ఇదం జాతు సబ్బజీ, ఇదం జాతు అపలిఖతం గణ్డమూలం పలిఖణి’’’న్తి. దసమం.

సళవగ్గో దసమో.

తస్సుద్దానం –

ద్వే సంగయ్హా పరిహానం, పమాదవిహారీ చ సంవరో;

సమాధి పటిసల్లానం, ద్వే నతుమ్హాకేన ఉద్దకోతి.

సళాయతనవగ్గే దుతియపణ్ణాసకో సమత్తో.

తస్స వగ్గుద్దానం –

అవిజ్జా మిగజాలఞ్చ, గిలానం ఛన్నం చతుత్థకం;

సళవగ్గేన పఞ్ఞాసం, దుతియో పణ్ణాసకో అయన్తి.

పఠమసతకం.