౧౨. బాహిరానత్తాతీతానాగతసుత్తం

౧౨. ‘‘రూపా, భిక్ఖవే, అనత్తా అతీతానాగతా; కో పన వాదో పచ్చుప్పన్నానం! ఏవం పస్సం, భిక్ఖవే, సుతవా అరియసావకో అతీతేసు రూపేసు అనపేక్ఖో హోతి; అనాగతే రూపే నాభినన్దతి; పచ్చుప్పన్నానం రూపానం నిబ్బిదాయ విరాగాయ నిరోధాయ పటిపన్నో హోతి. సద్దా… గన్ధా… రసా… ఫోట్ఠబ్బా… ధమ్మా అనత్తా అతీతానాగతా; కో పన వాదో పచ్చుప్పన్నానం! ఏవం పస్సం, భిక్ఖవే, సుతవా అరియసావకో అతీతేసు ధమ్మేసు అనపేక్ఖో హోతి; అనాగతే ధమ్మే నాభినన్దతి; పచ్చుప్పన్నానం ధమ్మానం నిబ్బిదాయ విరాగాయ నిరోధాయ పటిపన్నో హోతీ’’తి. ద్వాదసమం.

అనిచ్చవగ్గో పఠమో.

తస్సుద్దానం –

అనిచ్చం దుక్ఖం అనత్తా చ, తయో అజ్ఝత్తబాహిరా;

యదనిచ్చేన తయో వుత్తా, తే తే అజ్ఝత్తబాహిరాతి.