౮. నామరూపసుత్తం

౫౮. సావత్థియం విహరతి…పే… ‘‘సంయోజనియేసు, భిక్ఖవే, ధమ్మేసు అస్సాదానుపస్సినో విహరతో నామరూపస్స అవక్కన్తి హోతి. నామరూపపచ్చయా సళాయతనం…పే… ఏవమేతస్స కేవలస్స దుక్ఖక్ఖన్ధస్స సముదయో హోతి’’.

‘‘సేయ్యథాపి, భిక్ఖవే, మహారుక్ఖో. తస్స యాని చేవ మూలాని అధోగమాని, యాని చ తిరియఙ్గమాని, సబ్బాని తాని ఉద్ధం ఓజం అభిహరన్తి. ఏవఞ్హి సో, భిక్ఖవే, మహారుక్ఖో తదాహారో తదుపాదానో చిరం దీఘమద్ధానం తిట్ఠేయ్య. ఏవమేవ ఖో, భిక్ఖవే, సంయోజనియేసు ధమ్మేసు అస్సాదానుపస్సినో విహరతో నామరూపస్స అవక్కన్తి హోతి…పే….

‘‘సంయోజనియేసు, భిక్ఖవే, ధమ్మేసు ఆదీనవానుపస్సినో విహరతో నామరూపస్స అవక్కన్తి న హోతి. నామరూపనిరోధా సళాయతననిరోధో…పే… ఏవమేతస్స కేవలస్స దుక్ఖక్ఖన్ధస్స నిరోధో హోతి.

‘‘సేయ్యథాపి, భిక్ఖవే, మహారుక్ఖో. అథ పురిసో ఆగచ్ఛేయ్య కుద్దాలపిటకం ఆదాయ…పే… ఆయతిం అనుప్పాదధమ్మో. ఏవమేవ ఖో, భిక్ఖవే, సంయోజనియేసు ధమ్మేసు ఆదీనవానుపస్సినో విహరతో నామరూపస్స అవక్కన్తి న హోతి. నామరూపనిరోధా సళాయతననిరోధో…పే… ఏవమేతస్స కేవలస్స దుక్ఖక్ఖన్ధస్స నిరోధో హోతీ’’తి. అట్ఠమం.