౯. మాతుపోసకసుత్తం

౨౦౫. సావత్థినిదానం. అథ ఖో మాతుపోసకో బ్రాహ్మణో యేన భగవా తేనుపసఙ్కమి; ఉపసఙ్కమిత్వా భగవతా సద్ధిం సమ్మోది. సమ్మోదనీయం కథం సారణీయం వీతిసారేత్వా ఏకమన్తం నిసీది. ఏకమన్తం నిసిన్నో ఖో మాతుపోసకో బ్రాహ్మణో భగవన్తం ఏతదవోచ – ‘‘అహఞ్హి, భో గోతమ, ధమ్మేన భిక్ఖం పరియేసామి, ధమ్మేన భిక్ఖం పరియేసిత్వా మాతాపితరో పోసేమి. కచ్చాహం, భో గోతమ, ఏవంకారీ కిచ్చకారీ హోమీ’’తి? ‘‘తగ్ఘ త్వం, బ్రాహ్మణ, ఏవంకారీ కిచ్చకారీ హోసి. యో ఖో, బ్రాహ్మణ, ధమ్మేన భిక్ఖం పరియేసతి, ధమ్మేన భిక్ఖం పరియేసిత్వా మాతాపితరో పోసేతి, బహుం సో పుఞ్ఞం పసవతీ’’తి.

‘‘యో మాతరం పితరం వా, మచ్చో ధమ్మేన పోసతి;

తాయ నం పారిచరియాయ, మాతాపితూసు పణ్డితా;

ఇధేవ నం పసంసన్తి, పేచ్చ సగ్గే పమోదతీ’’తి.

ఏవం వుత్తే, మాతుపోసకో బ్రాహ్మణో భగవన్తం ఏతదవోచ – ‘‘అభిక్కన్తం భో గోతమ, అభిక్కన్తం, భో గోతమ…పే… ఉపాసకం మం భవం గోతమో ధారేతు అజ్జతగ్గే పాణుపేతం సరణం గత’’న్తి.