౫. ఉప్పలవణ్ణాసుత్తం

౧౬౬. సావత్థినిదానం. అథ ఖో ఉప్పలవణ్ణా భిక్ఖునీ పుబ్బణ్హసమయం నివాసేత్వా…పే… అఞ్ఞతరస్మిం సుపుప్ఫితసాలరుక్ఖమూలే అట్ఠాసి. అథ ఖో మారో పాపిమా ఉప్పలవణ్ణాయ భిక్ఖునియా భయం ఛమ్భితత్తం లోమహంసం ఉప్పాదేతుకామో సమాధిమ్హా చావేతుకామో యేన ఉప్పలవణ్ణా భిక్ఖునీ తేనుపసఙ్కమి; ఉపసఙ్కమిత్వా ఉప్పలవణ్ణం భిక్ఖునిం గాథాయ అజ్ఝభాసి –

‘‘సుపుప్ఫితగ్గం ఉపగమ్మ భిక్ఖుని,

ఏకా తువం తిట్ఠసి సాలమూలే;

న చత్థి తే దుతియా వణ్ణధాతు,

బాలే న త్వం భాయసి ధుత్తకాన’’న్తి.

అథ ఖో ఉప్పలవణ్ణాయ భిక్ఖునియా ఏతదహోసి – ‘‘కో ను ఖ్వాయం మనుస్సో వా అమనుస్సో వా గాథం భాసతీ’’తి? అథ ఖో ఉప్పలవణ్ణాయ భిక్ఖునియా ఏతదహోసి – ‘‘మారో ఖో అయం పాపిమా మమ భయం ఛమ్భితత్తం లోమహంసం ఉప్పాదేతుకామో సమాధిమ్హా చావేతుకామో గాథం భాసతీ’’తి. అథ ఖో ఉప్పలవణ్ణా భిక్ఖునీ ‘‘మారో అయం పాపిమా’’ ఇతి విదిత్వా మారం పాపిమన్తం గాథాహి పచ్చభాసి –

‘‘సతం సహస్సానిపి ధుత్తకానం,

ఇధాగతా తాదిసకా భవేయ్యుం;

లోమం న ఇఞ్జామి న సన్తసామి,

న మార భాయామి తమేకికాపి.

‘‘ఏసా అన్తరధాయామి, కుచ్ఛిం వా పవిసామి తే;

పఖుమన్తరికాయమ్పి, తిట్ఠన్తిం మం న దక్ఖసి.

‘‘చిత్తస్మిం వసీభూతామ్హి, ఇద్ధిపాదా సుభావితా;

సబ్బబన్ధనముత్తామ్హి, న తం భాయామి ఆవుసో’’తి.

అథ ఖో మారో పాపిమా ‘‘జానాతి మం ఉప్పలవణ్ణా భిక్ఖునీ’’తి దుక్ఖీ దుమ్మనో తత్థేవన్తరధాయీతి.