౧౦. నానాతిత్థియసావకసుత్తం

౧౧౧. ఏవం మే సుతం – ఏకం సమయం భగవా రాజగహే విహరతి వేళువనే కలన్దకనివాపే. అథ ఖో సమ్బహులా నానాతిత్థియసావకా దేవపుత్తా అసమో చ సహలి [సహలీ (సీ. స్యా. కం. పీ.)] చ నీకో [నిఙ్కో (సీ. పీ.), నికో (స్యా. కం.)] చ ఆకోటకో చ వేగబ్భరి చ [వేటమ్బరీ చ (సీ. స్యా. కం. పీ.)] మాణవగామియో చ అభిక్కన్తాయ రత్తియా అభిక్కన్తవణ్ణా కేవలకప్పం వేళువనం ఓభాసేత్వా యేన భగవా తేనుపసఙ్కమింసు; ఉపసఙ్కమిత్వా భగవన్తం అభివాదేత్వా ఏకమన్తం అట్ఠంసు. ఏకమన్తం ఠితో ఖో అసమో దేవపుత్తో పూరణం కస్సపం ఆరబ్భ భగవతో సన్తికే ఇమం గాథం అభాసి –

‘‘ఇధ ఛిన్దితమారితే, హతజానీసు కస్సపో;

న పాపం సమనుపస్సతి, పుఞ్ఞం వా పన అత్తనో;

స వే విస్సాసమాచిక్ఖి, సత్థా అరహతి మానన’’న్తి.

అథ ఖో సహలి దేవపుత్తో మక్ఖలిం గోసాలం ఆరబ్భ భగవతో సన్తికే ఇమం గాథం అభాసి –

‘‘తపోజిగుచ్ఛాయ సుసంవుతత్తో,

వాచం పహాయ కలహం జనేన;

సమోసవజ్జా విరతో సచ్చవాదీ,

న హి నూన తాదిసం కరోతి [న హ నున తాదీ పకరోతి (సీ. స్యా. కం.)] పాప’’న్తి.

అథ ఖో నీకో దేవపుత్తో నిగణ్ఠం నాటపుత్తం [నాథపుత్తం (సీ.)] ఆరబ్భ భగవతో సన్తికే ఇమం గాథం అభాసి –

‘‘జేగుచ్ఛీ నిపకో భిక్ఖు, చాతుయామసుసంవుతో;

దిట్ఠం సుతఞ్చ ఆచిక్ఖం, న హి నూన కిబ్బిసీ సియా’’తి.

అథ ఖో ఆకోటకో దేవపుత్తో నానాతిత్థియే ఆరబ్భ భగవతో సన్తికే ఇమం గాథం అభాసి –

‘‘పకుధకో కాతియానో నిగణ్ఠో,

యే చాపిమే మక్ఖలిపూరణాసే;

గణస్స సత్థారో సామఞ్ఞప్పత్తా,

న హి నూన తే సప్పురిసేహి దూరే’’తి.

అథ ఖో వేగబ్భరి దేవపుత్తో ఆకోటకం దేవపుత్తం గాథాయ పచ్చభాసి –

‘‘సహాచరితేన [సహారవేనాపి (క. సీ.), సగారవేనాపి (పీ.)] ఛవో సిగాలో [సిఙ్గాలో (క.)],

న కోత్థుకో సీహసమో కదాచి;

నగ్గో ముసావాదీ గణస్స సత్థా,

సఙ్కస్సరాచారో న సతం సరిక్ఖో’’తి.

అథ ఖో మారో పాపిమా బేగబ్భరిం దేవపుత్తం అన్వావిసిత్వా భగవతో సన్తికే ఇమం గాథం అభాసి –

‘‘తపోజిగుచ్ఛాయ ఆయుత్తా, పాలయం పవివేకియం;

రూపే చ యే నివిట్ఠాసే, దేవలోకాభినన్దినో;

తే వే సమ్మానుసాసన్తి, పరలోకాయ మాతియా’’తి.

అథ ఖో భగవా, ‘మారో అయం పాపిమా’ ఇతి విదిత్వా, మారం పాపిమన్తం గాథాయ పచ్చభాసి –

‘‘యే కేచి రూపా ఇధ వా హురం వా,

యే చన్తలిక్ఖస్మిం పభాసవణ్ణా;

సబ్బేవ తే తే నముచిప్పసత్థా,

ఆమిసంవ మచ్ఛానం వధాయ ఖిత్తా’’తి.

అథ ఖో మాణవగామియో దేవపుత్తో భగవన్తం ఆరబ్భ భగవతో సన్తికే ఇమా గాథాయో అభాసి –

‘‘విపులో రాజగహీయానం, గిరిసేట్ఠో పవుచ్చతి;

సేతో హిమవతం సేట్ఠో, ఆదిచ్చో అఘగామినం.

‘‘సముద్దో ఉదధినం సేట్ఠో, నక్ఖత్తానఞ్చ చన్దిమా [నక్ఖత్తానంవ చన్దిమా (క.)];

సదేవకస్స లోకస్స, బుద్ధో అగ్గో పవుచ్చతీ’’తి.

నానాతిత్థియవగ్గో తతియో.

తస్సుద్దానం –

సివో ఖేమో చ సేరీ చ, ఘటీ జన్తు చ రోహితో;

నన్దో నన్దివిసాలో చ, సుసిమో నానాతిత్థియేన తే దసాతి.

దేవపుత్తసంయుత్తం సమత్తం.