౭. బుద్ధవన్దనాసుత్తం

౨౬౩. సావత్థియం జేతవనే. తేన ఖో పన సమయేన భగవా దివావిహారగతో హోతి పటిసల్లీనో. అథ ఖో సక్కో చ దేవానమిన్దో బ్రహ్మా చ సహమ్పతి యేన భగవా తేనుపసఙ్కమింసు; ఉపసఙ్కమిత్వా పచ్చేకం ద్వారబాహం నిస్సాయ అట్ఠంసు. అథ ఖో సక్కో దేవానమిన్దో భగవతో సన్తికే ఇమం గాథం అభాసి –

‘‘ఉట్ఠేహి వీర విజితసఙ్గామ,

పన్నభార అనణ విచర లోకే;

చిత్తఞ్చ తే సువిముత్తం,

చన్దో యథా పన్నరసాయ రత్తి’’న్తి.

‘‘న ఖో, దేవానమిన్ద, తథాగతా ఏవం వన్దితబ్బా. ఏవఞ్చ ఖో, దేవానమిన్ద, తథాగతా వన్దితబ్బా –

‘‘ఉట్ఠేహి వీర విజితసఙ్గామ,

సత్థవాహ అనణ విచర లోకే;

దేసస్సు భగవా ధమ్మం,

అఞ్ఞాతారో భవిస్సన్తీ’’తి.