౨. దుతియవగ్గో

౧. వతపదసుత్తం

౨౫౭. సావత్థియం. ‘‘సక్కస్స, భిక్ఖవే, దేవానమిన్దస్స పుబ్బే మనుస్సభూతస్స సత్త వతపదాని [వత్తపదాని (క.)] సమత్తాని సమాదిన్నాని అహేసుం, యేసం సమాదిన్నత్తా సక్కో సక్కత్తం అజ్ఝగా. కతమాని సత్త వతపదాని? యావజీవం మాతాపేత్తిభరో అస్సం, యావజీవం కులే జేట్ఠాపచాయీ అస్సం, యావజీవం సణ్హవాచో అస్సం, యావజీవం అపిసుణవాచో అస్సం, యావజీవం విగతమలమచ్ఛేరేన చేతసా అగారం అజ్ఝావసేయ్యం ముత్తచాగో పయతపాణి వోస్సగ్గరతో యాచయోగో దానసంవిభాగరతో, యావజీవం సచ్చవాచో అస్సం, యావజీవం అక్కోధనో అస్సం – సచేపి మే కోధో ఉప్పజ్జేయ్య, ఖిప్పమేవ నం పటివినేయ్య’’న్తి. ‘‘సక్కస్స, భిక్ఖవే, దేవానమిన్దస్స పుబ్బే మనుస్సభూతస్స ఇమాని సత్త వతపదాని సమత్తాని సమాదిన్నాని అహేసుం, యేసం సమాదిన్నత్తా సక్కో సక్కత్తం అజ్ఝగా’’తి.

‘‘మాతాపేత్తిభరం జన్తుం, కులే జేట్ఠాపచాయినం;

సణ్హం సఖిలసమ్భాసం, పేసుణేయ్యప్పహాయినం.

‘‘మచ్ఛేరవినయే యుత్తం, సచ్చం కోధాభిభుం నరం;

తం వే దేవా తావతింసా, ఆహు సప్పురిసో ఇతీ’’తి.

౨. సక్కనామసుత్తం

౨౫౮. సావత్థియం జేతవనే. తత్ర ఖో భగవా భిక్ఖూ ఏతదవోచ – ‘‘సక్కో, భిక్ఖవే, దేవానమిన్దో పుబ్బే మనుస్సభూతో సమానో మఘో నామ మాణవో అహోసి, తస్మా మఘవాతి వుచ్చతి.

‘‘సక్కో, భిక్ఖవే, దేవానమిన్దో పుబ్బే మనుస్సభూతో సమానో పురే [పురే పురే (సీ. పీ.)] దానం అదాసి, తస్మా పురిన్దదోతి వుచ్చతి.

‘‘సక్కో, భిక్ఖవే, దేవానమిన్దో పుబ్బే మనుస్సభూతో సమానో సక్కచ్చం దానం అదాసి, తస్మా సక్కోతి వుచ్చతి.

‘‘సక్కో, భిక్ఖవే, దేవానమిన్దో పుబ్బే మనుస్సభూతో సమానో ఆవసథం అదాసి, తస్మా వాసవోతి వుచ్చతి.

‘‘సక్కో, భిక్ఖవే, దేవానమిన్దో సహస్సమ్పి అత్థానం ముహుత్తేన చిన్తేతి, తస్మా సహస్సక్ఖోతి వుచ్చతి.

‘‘సక్కస్స, భిక్ఖవే, దేవానమిన్దస్స సుజా నామ అసురకఞ్ఞా పజాపతి, తస్మా సుజమ్పతీతి వుచ్చతి.

‘‘సక్కో, భిక్ఖవే, దేవానమిన్దో దేవానం తావతింసానం ఇస్సరియాధిపచ్చం రజ్జం కారేతి, తస్మా దేవానమిన్దోతి వుచ్చతి.

‘‘సక్కస్స, భిక్ఖవే దేవానమిన్దస్స పుబ్బే మనుస్సభూతస్స సత్త వతపదాని సమత్తాని సమాదిన్నాని అహేసుం, యేసం సమాదిన్నత్తా సక్కో సక్కత్తం అజ్ఝగా. కతమాని సత్త వతపదాని? యావజీవం మాతాపేత్తిభరో అస్సం, యావజీవం కులే జేట్ఠాపచాయీ అస్సం, యావజీవం సణ్హవాచో అస్సం, యావజీవం అపిసుణవాచో అస్సం, యావజీవం విగతమలమచ్ఛేరేన చేతసా అగారం అజ్ఝావసేయ్యం ముత్తచాగో పయతపాణి వోస్సగ్గరతో యాచయోగో దానసంవిభాగరతో, యావజీవం సచ్చవాచో అస్సం, యావజీవం అక్కోధనో అస్సం – సచేపి మే కోధో ఉప్పజ్జేయ్య, ఖిప్పమేవ నం పటివినేయ్య’’న్తి. ‘‘సక్కస్స, భిక్ఖవే, దేవానమిన్దస్స పుబ్బే మనుస్సభూతస్స ఇమాని సత్త వతపదాని సమత్తాని సమాదిన్నాని అహేసుం, యేసం సమాదిన్నత్తా సక్కో సక్కత్తం అజ్ఝగా’’తి.

‘‘మాతాపేత్తిభరం జన్తుం, కులే జేట్ఠాపచాయినం;

సణ్హం సఖిలసమ్భాసం, పేసుణేయ్యప్పహాయినం.

‘‘మచ్ఛేరవినయే యుత్తం, సచ్చం కోధాభిభుం నరం;

తం వే దేవా తావతింసా, ఆహు సప్పురిసో ఇతీ’’తి.

౩. మహాలిసుత్తం

౨౫౯. ఏవం మే సుతం – ఏకం సమయం భగవా వేసాలియం విహరతి మహావనే కూటాగారసాలాయం. అథ ఖో మహాలి లిచ్ఛవీ యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో మహాలి లిచ్ఛవీ భగవన్తం ఏతదవోచ –

‘‘దిట్ఠో ఖో, భన్తే, భగవతా సక్కో దేవానమిన్దో’’తి?

‘‘దిట్ఠో ఖో మే, మహాలి, సక్కో దేవానమిన్దో’’తి.

‘‘సో హి నూన, భన్తే, సక్కపతిరూపకో భవిస్సతి. దుద్దసో హి, భన్తే, సక్కో దేవానమిన్దో’’తి.

‘‘సక్కఞ్చ ఖ్వాహం, మహాలి, పజానామి సక్కకరణే చ ధమ్మే, యేసం ధమ్మానం సమాదిన్నత్తా సక్కో సక్కత్తం అజ్ఝగా, తఞ్చ పజానామి.

‘‘సక్కో, మహాలి, దేవానమిన్దో పుబ్బే మనుస్సభూతో సమానో మఘో నామ మాణవో అహోసి, తస్మా మఘవాతి వుచ్చతి.

‘‘సక్కో, మహాలి, దేవానమిన్దో పుబ్బే మనుస్సభూతో సమానో సక్కచ్చం దానం అదాసి, తస్మా సక్కోతి వుచ్చతి.

‘‘సక్కో, మహాలి, దేవానమిన్దో పుబ్బే మనుస్సభూతో సమానో పురే దానం అదాసి, తస్మా పురిన్దదోతి వుచ్చతి.

‘‘సక్కో, మహాలి, దేవానమిన్దో పుబ్బే మనుస్సభూతో సమానో ఆవసథం అదాసి, తస్మా వాసవోతి వుచ్చతి.

‘‘సక్కో, మహాలి, దేవానమిన్దో సహస్సమ్పి అత్థానం ముహుత్తేన చిన్తేతి, తస్మా సహస్సక్ఖోతి వుచ్చతి.

‘‘సక్కస్స, మహాలి, దేవానమిన్దస్స సుజా నామ అసురకఞ్ఞా పజాపతి, తస్మా సుజమ్పతీతి వుచ్చతి.

‘‘సక్కో, మహాలి, దేవానమిన్దో దేవానం తావతింసానం ఇస్సరియాధిపచ్చం రజ్జం కారేతి, తస్మా దేవానమిన్దోతి వుచ్చతి.

‘‘సక్కస్స, మహాలి, దేవానమిన్దస్స పుబ్బే మనుస్సభూతస్స సత్త వతపదాని సమత్తాని సమాదిన్నాని అహేసుం, యేసం సమాదిన్నత్తా సక్కో సక్కత్తం అజ్ఝగా. కతమాని సత్త వతపదాని? యావజీవం మాతాపేత్తిభరో అస్సం, యావజీవం కులే జేట్ఠాపచాయీ అస్సం, యావజీవం సణ్హవాచో అస్సం, యావజీవం అపిసుణవాచో అస్సం, యావజీవం విగతమలమచ్ఛేరేన చేతసా అగారం అజ్ఝావసేయ్యం ముత్తచాగో పయతపాణి వోస్సగ్గరతో యాచయోగో దానసంవిభాగరతో, యావజీవం సచ్చవాచో అస్సం, యావజీవం అక్కోధనో అస్సం – సచేపి మే కోధో ఉప్పజేయ్య, ఖిప్పమేవ నం పటివినేయ్య’’న్తి. ‘‘సక్కస్స, మహాలి, దేవానమిన్దస్స పుబ్బే మనుస్సభూతస్స ఇమాని సత్త వతపదాని సమత్తాని సమాదిన్నాని అహేసుం, యేసం సమాదిన్నత్తా సక్కో సక్కత్తం అజ్ఝగా’’తి.

‘‘మాతాపేత్తిభరం జన్తుం, కులే జేట్ఠాపచాయినం;

సణ్హం సఖిలసమ్భాసం, పేసుణేయ్యప్పహాయినం.

‘‘మచ్ఛేరవినయే యుత్తం, సచ్చం కోధాభిభుం నరం;

తం వే దేవా తావతింసా, ఆహు సప్పురిసో ఇతీ’’తి.

౪. దలిద్దసుత్తం

౨౬౦. ఏకం సమయం భగవా రాజగహే విహరతి వేళువనే కలన్దకనివాపే. తత్ర ఖో భగవా భిక్ఖూ ఆమన్తేసి – ‘‘భిక్ఖవో’’తి. ‘‘భదన్తే’’తి తే భిక్ఖూ భగవతో పచ్చస్సోసుం. భగవా ఏతదవోచ –

‘‘భూతపుబ్బం, భిక్ఖవే, అఞ్ఞతరో పురిసో ఇమస్మింయేవ రాజగహే మనుస్సదలిద్దో [మనుస్సదళిద్దో (సీ. స్యా. కం.)] అహోసి మనుస్సకపణో మనుస్సవరాకో. సో తథాగతప్పవేదితే ధమ్మవినయే సద్ధం సమాదియి, సీలం సమాదియి, సుతం సమాదియి, చాగం సమాదియి, పఞ్ఞం సమాదియి. సో తథాగతప్పవేదితే ధమ్మవినయే సద్ధం సమాదియిత్వా సీలం సమాదియిత్వా సుతం సమాదియిత్వా చాగం సమాదియిత్వా పఞ్ఞం సమాదియిత్వా కాయస్స భేదా పరం మరణా సుగతిం సగ్గం లోకం ఉపపజ్జి దేవానం తావతింసానం సహబ్యతం. సో అఞ్ఞే దేవే అతిరోచతి వణ్ణేన చేవ యససా చ. తత్ర సుదం, భిక్ఖవే, దేవా తావతింసా ఉజ్ఝాయన్తి ఖియ్యన్తి విపాచేన్తి – ‘అచ్ఛరియం వత భో, అబ్భుతం వత భో! అయఞ్హి దేవపుత్తో పుబ్బే మనుస్సభూతో సమానో మనుస్సదలిద్దో అహోసి మనుస్సకపణో మనుస్సవరాకో; సో కాయస్స భేదా పరం మరణా సుగతిం సగ్గం లోకం ఉపపన్నో దేవానం తావతింసానం సహబ్యతం. సో అఞ్ఞే దేవే అతిరోచతి వణ్ణేన చేవ యససా చా’’’తి.

‘‘అథ ఖో, భిక్ఖవే, సక్కో దేవానమిన్దో దేవే తావతింసే ఆమన్తేసి – ‘మా ఖో తుమ్హే, మారిసా, ఏతస్స దేవపుత్తస్స ఉజ్ఝాయిత్థ. ఏసో ఖో, మారిసా, దేవపుత్తో పుబ్బే మనుస్సభూతో సమానో తథాగతప్పవేదితే ధమ్మవినయే సద్ధం సమాదియి, సీలం సమాదియి, సుతం సమాదియి, చాగం సమాదియి, పఞ్ఞం సమాదియి. సో తథాగతప్పవేదితే ధమ్మవినయే సద్ధం సమాదియిత్వా సీలం సమాదియిత్వా సుతం సమాదియిత్వా చాగం సమాదియిత్వా పఞ్ఞం సమాదియిత్వా కాయస్స భేదా పరం మరణా సుగతిం సగ్గం లోకం ఉపపన్నో దేవానం తావతింసానం సహబ్యతం. సో అఞ్ఞే దేవే అతిరోచతి వణ్ణేన చేవ యససా చా’’’తి. అథ ఖో, భిక్ఖవే, సక్కో దేవానమిన్దో దేవే తావతింసే అనునయమానో తాయం వేలాయం ఇమా గాథాయో అభాసి –

‘‘యస్స సద్ధా తథాగతే, అచలా సుప్పతిట్ఠితా;

సీలఞ్చ యస్స కల్యాణం, అరియకన్తం పసంసితం.

‘‘సఙ్ఘే పసాదో యస్సత్థి, ఉజుభూతఞ్చ దస్సనం;

అదలిద్దోతి తం ఆహు, అమోఘం తస్స జీవితం.

‘‘తస్మా సద్ధఞ్చ సీలఞ్చ, పసాదం ధమ్మదస్సనం;

అనుయుఞ్జేథ మేధావీ, సరం బుద్ధాన సాసన’’న్తి.

౫. రామణేయ్యకసుత్తం

౨౬౧. సావత్థియం జేతవనే. అథ ఖో సక్కో దేవానమిన్దో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం అట్ఠాసి. ఏకమన్తం ఠితో ఖో సక్కో దేవానమిన్దో భగవన్తం ఏతదవోచ – ‘‘కిం ను ఖో, భన్తే, భూమిరామణేయ్యక’’న్తి?

‘‘ఆరామచేత్యా వనచేత్యా, పోక్ఖరఞ్ఞో సునిమ్మితా;

మనుస్సరామణేయ్యస్స, కలం నాగ్ఘన్తి సోళసిం.

‘‘గామే వా యది వారఞ్ఞే, నిన్నే వా యది వా థలే;

యత్థ అరహన్తో విహరన్తి, తం భూమిరామణేయ్యక’’న్తి.

౬. యజమానసుత్తం

౨౬౨. ఏకం సమయం భగవా రాజగహే విహరతి గిజ్ఝకూటే పబ్బతే. అథ ఖో సక్కో దేవానమిన్దో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం అట్ఠాసి. ఏకమన్తం ఠితో ఖో సక్కో దేవానమిన్దో భగవన్తం గాథాయ అజ్ఝభాసి –

‘‘యజమానానం మనుస్సానం, పుఞ్ఞపేక్ఖాన పాణినం;

కరోతం ఓపధికం పుఞ్ఞం, కత్థ దిన్నం మహప్ఫల’’న్తి.

‘‘చత్తారో చ పటిపన్నా, చత్తారో చ ఫలే ఠితా;

ఏస సఙ్ఘో ఉజుభూతో, పఞ్ఞాసీలసమాహితో.

‘‘యజమానానం మనుస్సానం, పుఞ్ఞపేక్ఖాన పాణినం;

కరోతం ఓపధికం పుఞ్ఞం, సఙ్ఘే దిన్నం మహప్ఫల’’న్తి.

౭. బుద్ధవన్దనాసుత్తం

౨౬౩. సావత్థియం జేతవనే. తేన ఖో పన సమయేన భగవా దివావిహారగతో హోతి పటిసల్లీనో. అథ ఖో సక్కో చ దేవానమిన్దో బ్రహ్మా చ సహమ్పతి యేన భగవా తేనుపసఙ్కమింసు; ఉపసఙ్కమిత్వా పచ్చేకం ద్వారబాహం నిస్సాయ అట్ఠంసు. అథ ఖో సక్కో దేవానమిన్దో భగవతో సన్తికే ఇమం గాథం అభాసి –

‘‘ఉట్ఠేహి వీర విజితసఙ్గామ,

పన్నభార అనణ విచర లోకే;

చిత్తఞ్చ తే సువిముత్తం,

చన్దో యథా పన్నరసాయ రత్తి’’న్తి.

‘‘న ఖో, దేవానమిన్ద, తథాగతా ఏవం వన్దితబ్బా. ఏవఞ్చ ఖో, దేవానమిన్ద, తథాగతా వన్దితబ్బా –

‘‘ఉట్ఠేహి వీర విజితసఙ్గామ,

సత్థవాహ అనణ విచర లోకే;

దేసస్సు భగవా ధమ్మం,

అఞ్ఞాతారో భవిస్సన్తీ’’తి.

౮. గహట్ఠవన్దనాసుత్తం

౨౬౪. సావత్థియం. తత్ర…పే… ఏతదవోచ – ‘‘భూతపుబ్బం, భిక్ఖవే, సక్కో దేవానమిన్దో మాతలిం సఙ్గాహకం ఆమన్తేసి – ‘యోజేహి, సమ్మ మాతలి, సహస్సయుత్తం ఆజఞ్ఞరథం. ఉయ్యానభూమిం గచ్ఛామ సుభూమిం దస్సనాయా’తి. ‘ఏవం భద్దన్తవా’తి ఖో, భిక్ఖవే, మాతలి సఙ్గాహకో సక్కస్స దేవానమిన్దస్స పటిస్సుత్వా సహస్సయుత్తం ఆజఞ్ఞరథం యోజేత్వా సక్కస్స దేవానమిన్దస్స పటివేదేసి – ‘యుత్తో ఖో తే, మారిస, సహస్సయుత్తో ఆజఞ్ఞరథో. యస్స దాని కాలం మఞ్ఞసీ’’’తి. అథ ఖో, భిక్ఖవే, సక్కో దేవానమిన్దో వేజయన్తపాసాదా ఓరోహన్తో అఞ్జలిం కత్వా [పఞ్జలికో (పీ.), పఞ్జలిం కత్వా (క.)] సుదం పుథుద్దిసా నమస్సతి. అథ ఖో, భిక్ఖవే, మాతలి సఙ్గాహకో సక్కం దేవానమిన్దం గాథాయ అజ్ఝభాసి –

‘‘తం నమస్సన్తి తేవిజ్జా, సబ్బే భుమ్మా చ ఖత్తియా;

చత్తారో చ మహారాజా, తిదసా చ యసస్సినో;

అథ కో నామ సో యక్ఖో, యం త్వం సక్క నమస్ససీ’’తి.

‘‘మం నమస్సన్తి తేవిజ్జా, సబ్బే భుమ్మా చ ఖత్తియా;

చత్తారో చ మహారాజా, తిదసా చ యసస్సినో.

‘‘అహఞ్చ సీలసమ్పన్నే, చిరరత్తసమాహితే;

సమ్మాపబ్బజితే వన్దే, బ్రహ్మచరియపరాయనే.

‘‘యే గహట్ఠా పుఞ్ఞకరా, సీలవన్తో ఉపాసకా;

ధమ్మేన దారం పోసేన్తి, తే నమస్సామి మాతలీ’’తి.

‘‘సేట్ఠా హి కిర లోకస్మిం, యే త్వం సక్క నమస్ససి;

అహమ్పి తే నమస్సామి, యే నమస్ససి వాసవా’’తి.

‘‘ఇదం వత్వాన మఘవా, దేవరాజా సుజమ్పతి;

పుథుద్దిసా నమస్సిత్వా, పముఖో రథమారుహీ’’తి.

౯. సత్థారవన్దనాసుత్తం

౨౬౫. సావత్థియం జేతవనే. ‘‘భూతపుబ్బం, భిక్ఖవే, సక్కో దేవానమిన్దో మాతలిం సఙ్గాహకం ఆమన్తేసి – ‘యోజేహి, సమ్మ మాతలి, సహస్సయుత్తం ఆజఞ్ఞరథం, ఉయ్యానభూమిం గచ్ఛామ సుభూమిం దస్సనాయా’తి. ‘ఏవం భద్దన్తవా’తి ఖో, భిక్ఖవే, మాతలి సఙ్గాహకో సక్కస్స దేవానమిన్దస్స పటిస్సుత్వా సహస్సయుత్తం ఆజఞ్ఞరథం యోజేత్వా సక్కస్స దేవానమిన్దస్స పటివేదేసి – ‘యుత్తో ఖో తే, మారిస, సహస్సయుత్తో ఆజఞ్ఞరథో. యస్స దాని కాలం మఞ్ఞసీ’’’తి. అథ ఖో, భిక్ఖవే, సక్కో దేవానమిన్దో వేజయన్తపాసాదా ఓరోహన్తో అఞ్జలిం కత్వా సుదం భగవన్తం నమస్సతి. అథ ఖో, భిక్ఖవే, మాతలి సఙ్గాహకో సక్కం దేవానమిన్దం గాథాయ అజ్ఝభాసి –

‘‘యఞ్హి దేవా మనుస్సా చ, తం నమస్సన్తి వాసవ;

అథ కో నామ సో యక్ఖో, యం త్వం సక్క నమస్ససీ’’తి.

‘‘యో ఇధ సమ్మాసమ్బుద్ధో, అస్మిం లోకే సదేవకే;

అనోమనామం సత్థారం, తం నమస్సామి మాతలి.

‘‘యేసం రాగో చ దోసో చ, అవిజ్జా చ విరాజితా;

ఖీణాసవా అరహన్తో, తే నమస్సామి మాతలి.

‘‘యే రాగదోసవినయా, అవిజ్జాసమతిక్కమా;

సేక్ఖా అపచయారామా, అప్పమత్తానుసిక్ఖరే;

తే నమస్సామి మాతలీ’’తి.

‘‘సేట్ఠా హి కిర లోకస్మిం, యే త్వం సక్క నమస్ససి;

అహమ్పి తే నమస్సామి, యే నమస్ససి వాసవా’’తి.

‘‘ఇదం వత్వాన మఘవా, దేవరాజా సుజమ్పతి;

భగవన్తం నమస్సిత్వా, పముఖో రథమారుహీ’’తి.

౧౦. సఙ్ఘవన్దనాసుత్తం

౨౬౬. సావత్థియం జేతవనే. తత్ర ఖో…పే… ఏతదవోచ – ‘‘భూతపుబ్బం, భిక్ఖవే, సక్కో దేవానమిన్దో మాతలిం సఙ్గాహకం ఆమన్తేసి – ‘యోజేహి, సమ్మ మాతలి, సహస్సయుత్తం ఆజఞ్ఞరథం, ఉయ్యానభూమిం గచ్ఛామ సుభూమిం దస్సనాయా’తి. ‘ఏవం భద్దన్తవా’తి ఖో, భిక్ఖవే, మాతలి సఙ్గాహకో సక్కస్స దేవానమిన్దస్స పటిస్సుత్వా, సహస్సయుత్తం ఆజఞ్ఞరథం యోజేత్వా సక్కస్స దేవానమిన్దస్స పటివేదేసి – ‘యుత్తో ఖో తే, మారిస, సహస్సయుత్తో ఆజఞ్ఞరథో, యస్స దాని కాలం మఞ్ఞసీ’’’తి. అథ ఖో, భిక్ఖవే, సక్కో దేవానమిన్దో వేజయన్తపాసాదా ఓరోహన్తో అఞ్జలిం కత్వా సుదం భిక్ఖుసఙ్ఘం నమస్సతి. అథ ఖో, భిక్ఖవే, మాతలి సఙ్గాహకో సక్కం దేవానమిన్దం గాథాయ అజ్ఝభాసి –

‘‘తఞ్హి ఏతే నమస్సేయ్యుం, పూతిదేహసయా నరా;

నిముగ్గా కుణపమ్హేతే, ఖుప్పిపాససమప్పితా.

‘‘కిం ను తేసం పిహయసి, అనాగారాన వాసవ;

ఆచారం ఇసినం బ్రూహి, తం సుణోమ వచో తవా’’తి.

‘‘ఏతం తేసం పిహయామి, అనాగారాన మాతలి;

యమ్హా గామా పక్కమన్తి, అనపేక్ఖా వజన్తి తే.

‘‘న తేసం కోట్ఠే ఓపేన్తి, న కుమ్భి [న కుమ్భా (స్యా. కం. పీ. క.)] న కళోపియం [ఖళోపియం (సీ.)];

పరనిట్ఠితమేసానా [పరనిట్ఠితమేసనా (స్యా. కం. క.)], తేన యాపేన్తి సుబ్బతా.

‘‘సుమన్తమన్తినో ధీరా, తుణ్హీభూతా సమఞ్చరా;

దేవా విరుద్ధా అసురేహి, పుథు మచ్చా చ మాతలి.

‘‘అవిరుద్ధా విరుద్ధేసు, అత్తదణ్డేసు నిబ్బుతా;

సాదానేసు అనాదానా, తే నమస్సామి మాతలీ’’తి.

‘‘సేట్ఠా హి కిర లోకస్మిం, యే త్వం సక్క నమస్ససి;

అహమ్పి తే నమస్సామి, యే నమస్ససి వాసవా’’తి.

‘‘ఇదం వత్వాన మఘవా, దేవరాజా సుజమ్పతి;

భిక్ఖుసఙ్ఘం నమస్సిత్వా, పముఖో రథమారుహీ’’తి.

దుతియో వగ్గో.

తస్సుద్దానం –

దేవా పన [వ తపదేన (సీ. స్యా. కం.)] తయో వుత్తా, దలిద్దఞ్చ రామణేయ్యకం;

యజమానఞ్చ వన్దనా, తయో సక్కనమస్సనాతి.