౩. తతియవగ్గో

౧. ఛేత్వాసుత్తం

౨౬౭. సావత్థియం జేతవనే. అథ ఖో సక్కో దేవానమిన్దో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం అట్ఠాసి. ఏకమన్తం ఠితో ఖో సక్కో దేవానమిన్దో భగవన్తం గాథాయ అజ్ఝభాసి –

‘‘కింసు ఛేత్వా సుఖం సేతి, కింసు ఛేత్వా న సోచతి;

కిస్సస్సు ఏకధమ్మస్స, వధం రోచేసి గోతమా’’తి.

‘‘కోధం ఛేత్వా సుఖం సేతి, కోధం ఛేత్వా న సోచతి;

కోధస్స విసమూలస్స, మధురగ్గస్స వాసవ;

వధం అరియా పసంసన్తి, తఞ్హి ఛేత్వా న సోచతీ’’తి.

౨. దుబ్బణ్ణియసుత్తం

౨౬౮. సావత్థియం జేతవనే. తత్ర ఖో…పే… ఏతదవోచ – ‘‘భూతపుబ్బం, భిక్ఖవే, అఞ్ఞతరో యక్ఖో దుబ్బణ్ణో ఓకోటిమకో సక్కస్స దేవానమిన్దస్స ఆసనే నిసిన్నో అహోసి. తత్ర సుదం, భిక్ఖవే, దేవా తావతింసా ఉజ్ఝాయన్తి ఖియ్యన్తి విపాచేన్తి – ‘అచ్ఛరియం వత భో, అబ్భుతం వత, భో! అయం యక్ఖో దుబ్బణ్ణో ఓకోటిమకో సక్కస్స దేవానమిన్దస్స ఆసనే నిసిన్నో’’’తి! యథా యథా ఖో, భిక్ఖవే, దేవా తావతింసా ఉజ్ఝాయన్తి ఖియ్యన్తి విపాచేన్తి, తథా తథా సో యక్ఖో అభిరూపతరో చేవ హోతి దస్సనీయతరో చ పాసాదికతరో చ.

‘‘అథ ఖో, భిక్ఖవే, దేవా తావతింసా యేన సక్కో దేవానమిన్దో తేనుపసఙ్కమింసు; ఉపసఙ్కమిత్వా సక్కం దేవానమిన్దం ఏతదవోచుం – ‘ఇధ తే, మారిస, అఞ్ఞతరో యక్ఖో దుబ్బణ్ణో ఓకోటిమకో సక్కస్స దేవానమిన్దస్స ఆసనే నిసిన్నో. తత్ర సుదం, మారిస, దేవా తావతింసా ఉజ్ఝాయన్తి ఖియ్యన్తి విపాచేన్తి – అచ్ఛరియం వత, భో, అబ్భుతం వత, భో! అయం యక్ఖో దుబ్బణ్ణో ఓకోటిమకో సక్కస్స దేవానమిన్దస్స ఆసనే నిసిన్నోతి. యథా యథా ఖో, మారిస, దేవా ఉజ్ఝాయన్తి ఖియ్యన్తి విపాచేన్తి, తథా తథా సో యక్ఖో అభిరూపతరో చేవ హోతి దస్సనీయతరో చ పాసాదికతరో చాతి. సో హి నూన, మారిస, కోధభక్ఖో యక్ఖో భవిస్సతీ’’’తి.

‘‘అథ ఖో, భిక్ఖవే, సక్కో దేవానమిన్దో యేన సో కోధభక్ఖో యక్ఖో తేనుపసఙ్కమి; ఉపసఙ్కమిత్వా ఏకంసం ఉత్తరాసఙ్గం కరిత్వా దక్ఖిణజాణుమణ్డలం పథవియం నిహన్త్వా యేన సో కోధభక్ఖో యక్ఖో తేనఞ్జలిం పణామేత్వా తిక్ఖత్తుం నామం సావేతి – ‘సక్కోహం మారిస, దేవానమిన్దో, సక్కోహం, మారిస, దేవానమిన్దో’తి. యథా యథా ఖో, భిక్ఖవే, సక్కో దేవానమిన్దో నామం సావేసి, తథా తథా సో యక్ఖో దుబ్బణ్ణతరో చేవ అహోసి ఓకోటిమకతరో చ. దుబ్బణ్ణతరో చేవ హుత్వా ఓకోటిమకతరో చ తత్థేవన్తరధాయీ’’తి. అథ ఖో, భిక్ఖవే, సక్కో దేవానమిన్దో సకే ఆసనే నిసీదిత్వా దేవే తావతింసే అనునయమానో తాయం వేలాయం ఇమా గాథాయో అభాసి –

‘‘న సూపహతచిత్తోమ్హి, నావత్తేన సువానయో;

న వో చిరాహం కుజ్ఝామి, కోధో మయి నావతిట్ఠతి.

‘‘కుద్ధాహం న ఫరుసం బ్రూమి, న చ ధమ్మాని కిత్తయే;

సన్నిగ్గణ్హామి అత్తానం, సమ్పస్సం అత్థమత్తనో’’తి.

౩. సమ్బరిమాయాసుత్తం

౨౬౯. సావత్థియం…పే… భగవా ఏతదవోచ – ‘‘భూతపుబ్బం, భిక్ఖవే, వేపచిత్తి అసురిన్దో ఆబాధికో అహోసి దుక్ఖితో బాళ్హగిలానో. అథ ఖో భిక్ఖవే, సక్కో దేవానమిన్దో యేన వేపచిత్తి అసురిన్దో తేనుపసఙ్కమి గిలానపుచ్ఛకో. అద్దసా ఖో, భిక్ఖవే, వేపచిత్తి అసురిన్దో సక్కం దేవానమిన్దం దూరతోవ ఆగచ్ఛన్తం. దిస్వాన సక్కం దేవానమిన్దం ఏతదవోచ – ‘తికిచ్ఛ మం దేవానమిన్దా’తి. ‘వాచేహి మం, వేపచిత్తి, సమ్బరిమాయ’న్తి. ‘న తావాహం వాచేమి, యావాహం, మారిస, అసురే పటిపుచ్ఛామీ’’’తి. ‘‘అథ ఖో, భిక్ఖవే, వేపచిత్తి అసురిన్దో అసురే పటిపుచ్ఛి – ‘వాచేమహం, మారిసా, సక్కం దేవానమిన్దం సమ్బరిమాయ’న్తి? ‘మా ఖో త్వం, మారిస, వాచేసి సక్కం దేవానమిన్దం సమ్బరిమాయ’’’న్తి. అథ ఖో, భిక్ఖవే, వేపచిత్తి అసురిన్దో సక్కం దేవానమిన్దం గాథాయ అజ్ఝభాసి –

‘‘మాయావీ మఘవా సక్క, దేవరాజ సుజమ్పతి;

ఉపేతి నిరయం ఘోరం, సమ్బరోవ సతం సమ’’న్తి.

౪. అచ్చయసుత్తం

౨౭౦. సావత్థియం…పే… ఆరామే. తేన ఖో పన సమయేన ద్వే భిక్ఖూ సమ్పయోజేసుం. తత్రేకో భిక్ఖు అచ్చసరా. అథ ఖో సో భిక్ఖు తస్స భిక్ఖునో సన్తికే అచ్చయం అచ్చయతో దేసేతి; సో భిక్ఖు నప్పటిగ్గణ్హాతి. అథ ఖో సమ్బహులా భిక్ఖూ యేన భగవా తేనుపసఙ్కమింసు; ఉపసఙ్కమిత్వా భగవన్తం అభివాదేత్వా ఏకమన్తం నిసీదింసు. ఏకమన్తం నిసిన్నా ఖో తే భిక్ఖూ భగవన్తం ఏతదవోచుం – ‘‘ఇధ, భన్తే, ద్వే భిక్ఖూ సమ్పయోజేసుం, తత్రేకో భిక్ఖు అచ్చసరా. అథ ఖో సో, భన్తే, భిక్ఖు తస్స భిక్ఖునో సన్తికే అచ్చయం అచ్చయతో దేసేతి, సో భిక్ఖు నప్పటిగ్గణ్హాతీ’’తి.

‘‘ద్వేమే, భిక్ఖవే, బాలా. యో చ అచ్చయం అచ్చయతో న పస్సతి, యో చ అచ్చయం దేసేన్తస్స యథాధమ్మం నప్పటిగ్గణ్హా’’తి – ఇమే ఖో, భిక్ఖవే, ద్వే బాలా. ‘‘ద్వేమే, భిక్ఖవే, పణ్డితా. యో చ అచ్చయం అచ్చయతో పస్సతి, యో చ అచ్చయం దేసేన్తస్స యథాధమ్మం పటిగ్గణ్హా’’తి – ఇమే ఖో, భిక్ఖవే, ద్వే పణ్డితా.

‘‘భూతపుబ్బం, భిక్ఖవే, సక్కో దేవానమిన్దో సుధమ్మాయం సభాయం దేవే తావతింసే అనునయమానో తాయం వేలాయం ఇమం గాథం అభాసి –

‘‘కోధో వో వసమాయాతు, మా చ మిత్తేహి వో జరా;

అగరహియం మా గరహిత్థ, మా చ భాసిత్థ పేసుణం;

అథ పాపజనం కోధో, పబ్బతోవాభిమద్దతీ’’తి.

౫. అక్కోధసుత్తం

౨౭౧. ఏవం మే సుతం – ఏకం సమయం భగవా సావత్థియం విహరతి జేతవనే అనాథపిణ్డికస్స ఆరామే. తత్ర ఖో భగవా భిక్ఖూ…పే… భగవా ఏతదవోచ – ‘‘భూతపుబ్బం, భిక్ఖవే, సక్కో దేవానమిన్దో సుధమ్మాయం సభాయం దేవే తావతింసే అనునయమానో తాయం వేలాయం ఇమం గాథం అభాసి –

‘‘మా వో కోధో అజ్ఝభవి, మా చ కుజ్ఝిత్థ కుజ్ఝతం;

అక్కోధో అవిహింసా చ, అరియేసు చ పటిపదా [వసతీ సదా (సీ. స్యా. కం. పీ.)];

అథ పాపజనం కోధో, పబ్బతోవాభిమద్దతీ’’తి.

తతియో వగ్గో.

తస్సుద్దానం –

ఛేత్వా దుబ్బణ్ణియమాయా, అచ్చయేన అకోధనో;

దేసితం బుద్ధసేట్ఠేన, ఇదఞ్హి సక్కపఞ్చకన్తి.

సక్కసంయుత్తం సమత్తం.